ASTARADA SƏRBƏST GÜLƏŞ ÜZRƏ AVROPA ÇEMPİONATININ GÜMÜŞ MÜKAFATÇISI İLƏ GÖRÜŞ KEÇİRİLMİŞDİR
Astara, 12 aprel (AZƏRTAC). Astara Rayon İcra Hakimiyyətində Litvanın paytaxtı Vilnüs şəhərində keçirilmiş sərbəst güləş üzrə Avropa çempionatının gümüş mükafatçısı Cəbrayıl Həsənovla görüş keçirilmişdir.
Tədbirdə rayon icra hakimiyyətinin başçısı Mahir Quliyev Cəbrayıl Həsənovu, onun məqçisi, sərbəst güləş üzrə Avropa çempionu Aslan Ağayevi və komanda yoldaşlarını qitə çempionatında qazandıqları parlaq qələbə münasibətilə təbrik etmiş, bu nailiyyəti Prezident İlham Əliyevin ölkəmizdə idmanın inikişafına göstərdiyi qayğının təzahürü kimi qiymətləndirmişdir.
Görüşdə Cəbrayıl Həsənovun təhsil aldığı Suparibağ kənd orta məktəbinin müəllimləri, idmançının məşqçiləri və ictimaiyyətin nümayəndələri qazandığı qələbə münasibətilə həmyerlilərinə ən xoş arzularını söyləmiş, respublikamızda idmanın inkişafına və onun maddi-texniki bazasının möhkəmləndirilməsinə göstərdiyi qayğıya görə dövlətimizin başçısına minnətdarlıqlarını bildirmişlər.
Tədbirin sonunda Cəbrayıl Həsənova və onun məşqçisi Aslan Ağayevə rayon icra hakimiyyəti adından “Beko” markalı rəngli televizor və pul mükafatı təqdim edilmişdir.
Bölmənin digər xəbərləri
