ATƏT PA-nın sessiyasında Azərbaycanda gender bərabərliyi sahəsində qazanılan uğurlardan danışılıb
Vyana, 21 fevral, AZƏRTAC
ATƏT Parlament Assambleyasının fevralın 18-dən 20-dək Vyanada keçirilən 14-cü qış sessiyasında gender məsələləri üzrə iclas təşkil olunub.
İclasda çıxış edən Azərbaycan nümayəndə heyətinin üzvü, Milli Məclisin insan hüquqları komitəsinin sədri Rəbiyyət Aslanova bildirib ki, Dünya İqtisadi Forumunun ekspertlərinə görə, hələ heç bir ölkə iqtisadiyyat, siyasət, təhsil və səhiyyə sahələrində kişi və qadınlar arasında tam bərabərhüquqluluğa nail ola bilməyib. Gender diskriminasiyası müxtəlif formalarda həm Qərb, həm də Şərq ölkələrində mövcuddur. Lakin Azərbaycan qadın hüquqları sahəsində tarixi təcrübəyə malikdir. Belə ki, Şərqdə ilk dəfə məhz Azərbaycanda gender bərabərliyi sahəsində qanunvericilik aktları qəbul olunub və 1918-ci ildə Azərbaycan Xalq Cümhuriyyəti tərəfindən qadınlara seçki hüququ verilib.
Azərbaycan bu gün qadınların hüquqlarının qorunması sahəsində bir çox uğurlara imza atıb və ATƏT-in üzvü kimi bu sahədə qanunvericiliyi modernləşdirib. Həmçinin, gender bərabərliyi “Azərbaycan 2020: gələcəyə baxış” İnkişaf Konsepsiyasının strateji məqsədlərindən biridir və bu sahədə üzrə məsələlər dövlətin diqqət mərkəzindədir.
Azərbaycanın gender bərabərliyi sahəsində beynəlxalq dialoq mərkəzinə çevrildiyini diqqətə çatdıran R.Aslanova son illərdə ölkəmizdə bununla bağlı bir sıra mühüm regional və beynəlxalq tədbirlərin keçirildiyini qeyd edib. Bildirib ki, gender bərabərliyi sahəsində nümunəvi ölkə olan Azərbaycanın ictimai-siyasi həyatında qadınlar xüsusi rol oynayırlar. Təhsil sahəsində çalışanların 70, səhiyyə sektorunda işləyənlərin isə 60 faizə yaxını qadınlardır. 2014-cü ildə keçirilmiş bələdiyyə seçkilərinin nəticələrinə görə, Azərbaycanda bələdiyyələrə seçilən qadınların sayı 2004-cü il seçkiləri ilə müqayisədə doqquz dəfə artıb.
Deputat bildirib ki, bütün bu uğurlar və müsbət göstəricilərlə yanaşı, Azərbaycanda bu sahədə bəzi problemlər də qalmaqdadır. Ermənistanın Azərbaycana təcavüzü nəticəsində ölkəmizin ərazisinin 20 faizi işğal olunub, bir milyondan çox vətəndaşın, o cümlədən qadınların hüquqları pozulub. Qaçqın və məcburi köçkünlər arasında qadınların əksəriyyət təşkil etdiyini vurğulayan R. Aslanova həmin insanların hüquqlarının hələ də bərpa olunmadığını deyib. O, Azərbaycanın ərazi bütövlüyünü dəstəkləyən beynəlxalq təşkilatların qərarlarına məhəl qoymayan Ermənistanın təcavüzkar və qeyri-konstruktiv siyasəti nəticəsində həmin insanların hələ də öz ata-baba torpaqlarına qayıda bilmədiklərini diqqətə çatdırıb.
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
