ATİ-də təlim kurslarını bitirənlərə sertifikatlar təqdim olunmuşdur
Bakı, 26 noyabr (AZƏRTAC). Azərbaycan Turizm İnstitutunda (ATİ) təşkil olunmuş beşgünlük təlim kurslarında iştirak edən dinləyicilərə sertifikatlar təqdim olunmuşdur.
AZƏRTAC xəbər verir ki, bu münasibətlə keçirilən mərasimdə Mədəniyyət və Turizm Nazirliyinin turizm şöbəsinin müdiri Aydın İsmiyev bildirmişdir ki, son illər respublikamızda turizm sahəsində ölkə başçısı tərəfindən imzalanan fərman və sərəncamlar turizmi iqtisadiyyatımızın prioritet sahələrindən birinə çevirmişdir.
Kursların uğurlu nəticələr verdiyini və gələn ilin may ayında “Eurovision-2012” mahnı müsabiqəsinin Bakı şəhərində keçiriləcəyini nəzərə alaraq, növbəti dəfə mehmanxana idarəçiləri, qeyd-qəbul, masa xidməti və xadiməçilik ixtisasları üzrə noyabr ayının 21-25-də təlim-tədris kursları təşkil olunmuşdur.
Bu istiqamətdə treninqlərin keçirilməsi paytaxtımızda fəaliyyət göstərən mehmanxana və ona bərabər tutulan yerləşdirmə obyektlərində xidmət səviyyəsinin yüksəldilməsinə və turizmin inkişafına öz töhfəsini verəcəkdir.
Türkiyədən dəvət olunmuş müəllimlər tərəfindən Azərbaycan Turizm İnstitutunda keçirilən kurslarda 40 oteldən 120-yə yaxın dinləyici iştirak etmişdir.
Bölmənin digər xəbərləri
