AVROPA BİRLİYİ SƏRHƏDLƏRİNİ GENİŞLƏNDİRİR
Oktyabrın 9-da Brüsseldə Avropa Komissiyası Avropa Birliyinə qəbul olunacaq növbəti namizəd ölkələrin siyahısını elan etmişdir. Komissiyanın qərarına görə, AB bir sıra ölkələri 2004-cü ildən etibarən bu quruma qəbul edəcək və birlik dövlətlərinin sayını 15-dən 25-ə çatdıracaqdır. Yeni qəbul olunacaq üzvlər Estoniya, Latviya, Litva, Polşa, Çexiya, Slovakiya, Sloveniya, Macarıstan və Kiprdir.
Komissiyanın qərarında deyilir ki, həmin ölkələr Avropa Birliyinə qəbul olunmağa tamamilə hazırdır və Birliyin üzvü olan dövlətlərin başçılarının bu ilin dekabrında Kopenhagendə keçiriləcək zirvə toplantısında məsələnin son siyasi və iqtisadi amilləri müzakirə edilməlidir. Namizəd dövlətlərdən Rumıniya və Bolqarıstana siyasi, iqtisadi, mədəni və sosial sahələrdə islahatları qüsurlu həyata keçirdiklərinə görə hələlik birliyə qəbulun növbəti dövrəsinə - 2007-ci ilə qədər gözləmək tövsiyə olunmuşdur.
Avropa Birliyinə üzvlüyə 13-cü namizəd olan Türkiyənin də gözləməsini məsləhət bilən Avropa Komissiyası öz qərarında bu dövlətə bəzi iradlar tutmuşdur.
Avropa Komissiyasının Almaniyadan olan komissarlarından biri - Qünter Ferhoyqen Türkiyənin birliyə üzv qəbul edilməsinin növbəti dəfə təxirə salınması barədə öz mövqeyini açıqlayaraq qeyd etmişdir ki, son sözü dövlət başçıları deməlidirlər. Çünki iqtisadi cəhətdən zəif, amma nəhəng Türkiyəni Avropa Birliyinə qəbul etməyə “çətinlik çəkənlər” 70 milyon müsəlman türkü bu qurumdan “hürkütməməli”, regiondakı strateji mühit və sabitlik amilini nəzərdən qaçırmamalı, bu ölkənin inkişafını Qərbə meyl istiqamətində gücləndirməyə cəhd etməlidirlər. Almaniyalı komissar onu da demişdir ki, Türkiyənin Avropa Birliyinə üzv olmasını təkidlə istəyənlərdən biri də onun NATO üzrə müttəfiqi ABŞ-dır. Türkiyə hazırda ABŞ-a İraqa qarşı gözlənilən müharibədə gərəkli müttəfiq ola bilər. Bunların hamısına görə Türkiyə Avropa Komissiyasının son qərarı ilə razılaşmayaraq, dekabrda Kopenhagendə keçiriləcək zirvə toplantısında qəbul oluna biləcək güzəştlərə ümid bəsləyir. Həmin güzəşt isə bu ölkənin birliyə üzv qəbul edilməsi haqda danışıqlara yenidən başlamaq vaxtının müəyyənləşdirilməsi səviyyəsində edilə bilər.
Yusif XƏLİLOV,
AZƏRTAC-ın xüsusi müxbiri
Berlin
Bölmənin digər xəbərləri
