Avropa İttifaqı ilə əməkdaşlıq Azərbaycanın xarici siyasətinin əsas prioritetlərindəndir
Bakı, 22 iyun, Səadət Hakıyeva, AZƏRTAC
Şərq Tərəfdaşlığı ölkələrinin videokonfrans formatında keçirilən Sammitində Azərbaycan Prezidenti İlham Əliyevin çıxışı və səsləndirdiyi mühüm çağırışlar, yaddaqalan təsbitlər geniş ictimai-siyasi əks-səda doğurub. İlk növbədə, qeyd etmək lazımdır ki, Avropa İttifaqı Şurasının prezidenti Şarl Mişel, Avropa Komissiyasının prezidenti Ursula fon der Lyayen, quruma üzv dövlətlərin və Şərq Tərəfdaşlığı ölkələrinin dövlət və hökumət başçılarının iştirakı ilə keçirilən Sammit istər tərkibinə, istərsə də müzakirə olunan mövzular baxımından böyük əhəmiyyətə malikdir.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva bildirib.
Komitə sədri diqqətə çatdırıb ki, Azərbaycan Prezidenti İlham Əliyevin çıxışı bir neçə məqamla diqqəti çəkir. Birincisi ona görə ki, Sammit qlobal pandemiya dönəmində keçirilir və respublikamız bu bəşəri problemlə bağlı qabaqcıl mövqeyə malikdir. Azərbaycan Prezidentinin sədri olduğu iki beynəlxalq qurum məhz onun təşəbbüsü ilə pandemiya ilə bağlı videomüzakirələr aparıb. Onlayn tədbirlərdə mühüm çıxışlar olub, mövqelər ifadə edilib. Qoşulmama Hərəkatının bu il mayın 4-də COVID-19-a həsr edilmiş onlayn Zirvə görüşündə Avropa İttifaqı və Afrika İttifaqının iştirakı xüsusi qeyd edilməlidir. Dövlətimiz Ümumdünya Səhiyyə Təşkilatına (ÜST) maliyyə yardımı göstərib və beynəlxalq qurum koronavirusla mübarizədə Azərbaycanı nümunəvi ölkə adlandırıb. Təsadüfi deyil ki, bu məqamları öz çıxışında vurğulayan Prezident İlham Əliyev Avropa İttifaqının ali nümayəndəsi Jozep Borelə videomüraciətinə görə bir daha təşəkkürünü bildirərək, bunun Aİ ilə Qoşulmama Hərəkatı arasında fəal əməkdaşlığın başlanğıcı olacağına əminliyini ifadə etdi. Əlbəttə, burada söhbət yalnız pandemiyadan getmir, Şərq Tərəfdaşlığının özünəməxsus ənənəvi müzakirə mövzuları, xüsusilə adından da göründüyü kimi, tərəfdaşlıq və tərəfdaşlıq üçün tələb olunan sülh və təhlükəsizlik, birgəyaşayış kimi mandat-missiyası vardır. Məhz bu mövzular Azərbaycanın sülhpərvər, multikultural mövqeyinə tam uyğundur. Prezident İlham Əliyevin də vurğuladığı kimi, Azərbaycan Şərq Tərəfdaşlığının fəal ölkəsidir. Avropa İttifaqı ilə əməkdaşlıq Azərbaycanın xarici siyasətinin əsas prioritetlərindəndir. Ölkəmizin Avropa İttifaqının bir çox üzvü ilə ikitərəfli planda da sıx əməkdaşlığı mövcuddur.
Q.Paşayeva videokonfrans zamanı Ermənistanın baş naziri Nikol Paşinyanın Prezident İlham Əliyevin çıxışına replika atması cəhdinə də toxunub. Qeyd edib ki, Azərbaycanın ərazi bütövlüyü uzun illərdir pozulub və zamanında öz havadarlarının hərbi-siyasi dəstəyi ilə işğal siyasətini həyata keçirmiş, bu bədnam siyasəti davam etdirən Ermənistanın baş naziri Nikol Paşinyanın Prezident İlham Əliyevin çıxışına replika ilə münasibət bildirmək cəhdi, ona verilən tutarlı cavab diqqət yetirməli olduğumuz ən əsas məqamlardandır. Azərbaycan Prezidenti “demokrat libaslı”, işğalçı zehniyyətli Paşinyanla əvvəllər də bir neçə dəfə debatda, müzakirələrdə üz-üzə gəlib və istisnasız olaraq, həmişə onu tutarlı cavabları ilə susdurub. Aşqabadda, Münxendə və digər şəhərlərdə keçirilən toplantılarda biz bunun şahidi olmuşuq. Budəfəki toplantı da istisna olmadı və yenə də Paşinyan özünü gülünc vəziyyətə saldı, tutarlı cavabdan sonra susmağa məcbur oldu.
“Paşinyan ənənəvi erməni xisləti ilə yalan deyib, iştirakçıları o yalana inandırmaq və bu yalan üzərindəki “hücum”la, özünün, təmsil etdiyi ölkənin işğalçılıq siyasətini ikinci plana keçirmək istəyində idi. Öz diktator, hərbi cani sələflərindən guya “demokrat”lığı ilə fərqlənən Paşinyan öz replikası, çıxışı və Azərbaycan Prezidentindən aldığı sərrast cavablarla miskin duruma düşməkdən qurtula bilmədi. Hamı bilir ki, bu, birinci, ikinci hal olmadığı üçün artıq nə təsadüf, nə də tendensiya deyil, bu, artıq qanunauyğunluqdur. Bu qanunauyğunluğun diktə etdiyi ən əsas məqam ondan ibarətdir ki, dünya birliyi işğalçıya “dur” deməlidir, bölgədə sülhə, təhlükəsizliyə ən əsas maneə olan işğalçılıq sona yetməlidir, işğalçı hər hansı forma və dərəcədə beynəlxalq qınağa və məsuliyyətə cəlb edilməlidir. Bu mənada, bu yaxınlarda Avropa Parlamenti adından verilmiş, Ermənistanın işğal altında saxladığı Azərbaycan torpaqlarında qeyri-qanuni yol çəkməsini, qanunsuz məskunlaşmanı pisləyən, respublikamızın ərazi bütövlüyünü müdafiə edən bəyanatı xüsusi əhəmiyyətə malikdir”, - deyə Qənirə Paşayeva bildirib.
Bölmənin digər xəbərləri
