Avropa İttifaqı qurumlarında koronavirusa ilk yoluxma halı qeydə alınıb
Riqa, 6 mart, AZƏRTAC
Avropa İttifaqı (Aİ) qurumlarında COVID-19 virusuna ilk yoluxma halı qeydə alınıb. Avropa Müdafiə Agentliyinin (EDA) əməkdaşlarından birinin koronavirusa görə verdiyi analizin nəticəsi müsbət çıxıb.
AZƏRTAC Latviyanın “Delfi” saytına istinadla verir ki, bu sözləri EDA-nın nümayəndəsi söyləyib.
Bildirilir ki, virusa yoluxan qurumun işçisi hazırda Avropada koronavirusun aktiv yayılma mərkəzi olan İtaliyadan məzuniyyətdən qayıdıb.
Qeyd edilir ki, son günlər koronavirusun kəskin yayılmasının qarşısını almaq məqsədilə Aİ-nin bir sıra qurumları tərəfindən ehtiyat tədbirləri görülür və yaxın üç həftə ərzində Avropa Parlamentinə heç kim buraxılmayacaq.
Qeyd edək ki, Avropa Müdafiə Agentliyinin Qərargah-mənzili Belçikanın paytaxtı Brüssel şəhərində yerləşir, burada təxminən 170 nəfər çalışır. Agentlik hərbi sahədə tədqiqatları və silahlanma sahəsində layihələri uzlaşdırır.
Asiman Əsədov
AZƏRTAC-ın xüsusi müxbiri
Riqa
Bölmənin digər xəbərləri
