MƏDƏNİYYƏT
Avropa Tarixi Termal Şəhərlər Assosiasiyasının ekspertləri ölkəmizdə səfərdədirlər
Bakı, 23 iyul, AZƏRTAC
Avropa Tarixi Termal Şəhərlər Assosiasiyasının (EHTTA) “Termal şəhərlər” beynəlxalq mədəni marşrutuna Azərbaycan Mədəniyyət və Turizm Nazirliyinin qoşulması ilə bağlı layihənin həyata keçirilməsi planlaşdırılır.
Nazirlikdən AZƏRTAC-a bildirilib ki, bununla bağlı Azərbaycanda “Termal şəhər” layihəsinə baxış keçirmək üçün EHTTA-nın eksperti Mişel Tomas Pinet və Bursa vilayətinin vitse-qubernatoru Əhməd Hikmət Şahindən ibarət nümayəndə heyəti iyulun 22-dən 29-dək ölkəmizdə səfərdədir.
Səfər çərçivəsində ekspertlərin Masallı, Qəbələ və Siyəzən rayonlarının termal suları və turizm infrastrukturuna baxış keçirilməsi nəzərdə tutulub. Eyni zamanda, qonaqlar Bakının və Abşeron yarımadasının tarix və mədəniyyət abidələri, turizm nümayişi obyektləri ilə tanış olacaqlar.