Avstraliyada 15 nəfərin ölümü ilə nəticələnən hadisə ilə bağlı məhkəmə sənədləri açıqlanıb
London, 22 dekabr, AZƏRTAC
Avstraliyanın “Bondi” çimərliyində baş verən silahlı hücumda şübhəli bilinən şəxslər hadisənin əvvəlində partlayıcı maddələrdən istifadə edib və hücuma hazırlaşmaq məqsədilə həftələr öncə təlimlər keçiblər.
AZƏRTAC BBC-yə istinadla xəbər verir ki, məhkəmə sənədlərində hücumun uzun müddət planlaşdırıldığı bildirilib. Dekabrın 14-də Hanuka bayramı münasibətilə keçirilən tədbir zamanı iki silahlı şəxs atəş açıb. Nəticədə 15 nəfər ölüb, onlarla insan yaralanıb. Məhkəmə materiallarında qeyd olunur ki, hücum zamanı istifadə edilən partlayıcı maddələrdən, o cümlədən “tennis topu bombası” adlandırılan qurğu partlamayıb.
24 yaşlı Navid Akram barəsində 59 maddə üzrə ittiham irəli sürülüb. Bu ittihamlar arasında 15 nəfərin qətli və terror fəaliyyəti ilə bağlı maddə də var. İkinci silahlı şəxs, onun atası Sacid Akram hadisə yerində polis tərəfindən zərərsizləşdirilib.
Sənədlərə görə, ata və oğul hücumu bir neçə ay ərzində dəqiqliklə planlaşdırıb. Bildirilir ki, atışmadan iki gün əvvəl onlar “Bondi” ərazisinə gələrək kəşfiyyat aparıblar. Keçən həftə sağ qalanların kimliyini qorumaq məqsədilə polis materiallarının dərcinə müvəqqəti qadağa qoyulmuşdu. Bazar ertəsi bu qadağa ləğv edilib və bəzi sənədlər ictimaiyyətə açıqlanıb. Materiallara hücumdan əvvəl şübhəlilərin hərəkətlərini əks etdirən bir neçə video da daxildir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
