Avtoxuliqanlıq edib tabesizlik göstərən şəxs saxlanılıb
Bakı, 9 avqust, AZƏRTAC
Sosial şəbəkələrdə DYP əməkdaşlarına tabesizlik göstərən sürücünün görüntüləri yayılıb.
Daxili İşlər Nazirliyinin mətbuat xidmətindən yayılan görüntülərə aydınlıq gətirilib. Nazirlikdən AZƏRTAC-a bildirilib ki, avqustun 8-də saat 17:30 radələrində paytaxt ərazisində yol hərəkəti qaydalarını pozaraq təhlükəli manevrlər etməklə insanların həyat və sağlamlığına real təhlükə yaratdığına görə “VAZ-2107” markalı avtomobilin sürücüsünə Dövlət Yol Polisi əməkdaşları tərəfindən “Saxla” işarəsi verilib. Lakin avtomobilin sürücüsü buna məhəl qoymayaraq, əhalinin dincliyini nümayişkaranə şəkildə pozaraq cəmiyyətə açıqca hörmətsizlik ifadə edən avtoxuliqanlıq hərəkətlərini davam etdirib.
Görülən tədbirlərlə sürücü - 1995-ci il təvəllüdlü Abdullayev Elşən Teyfur oğlu Nəsimi rayonu ərazisində saxlanılıb. O, saxlanılarkən polis əməkdaşlarının qanuni tələblərinə tabe olmayaraq müqavimət göstərib.
E.Abdullayev barəsində toplanmış materiallar aidiyyəti üzrə məhkəməyə göndərilib.
Bölmənin digər xəbərləri
