Ayətullah: Azərbaycan İslam elmlərinin beşiyi olub
Bakı, 15 sentyabr, AZƏRTAC
Azərbaycan yalnız alim və mütəfəkkirlərin yetişdiyi bir məkan olmayıb, həm də İslam elmlərinin beşiyi, elmi düşüncənin, maarifçiliyin, idrakın və irfanın inkişafı üçün əlverişli məkan olub.
AZƏRTAC xəbər verir ki, bunu İranın Qum elmi hövzəsinin alimi, ayətullah Şeyx Məhəmməd Reza Mostafa Mənhuçehri Naeyni Türk Dövlətləri Təşkilatının (TDT) müsəlman dini idarə rəhbərləri Şurasının 7-ci görüşü çərçivəsində keçirilən “İslam dünyasının mədəni irsində Seyyid Yəhya Bakuvi zirvəsi: mötədil dəyərlər və müasir çağırışlar” mövzusunda Birinci Beynəlxalq Konfransın ikinci günündə çıxışı zamanı deyib.
Ayətullah bildirib ki, Şeyx Yəhya Bakuvi şair, mütəfəkkir, azərbaycanlı alim və Xəlvətilik təriqətinin ən mühüm şəxsiyyətlərindən biridir.
O, Şeyx Seyid Yəhya Bakuvinin əlyazma və çap olunmuş bütün əsərlərinin toplanmasını və onların mötəbər elmi ensiklopediya şəklində nəşr edilməsini təklif edib.
Ayətullah vurğulayıb ki, Azərbaycanın alim və mütəfəkkirlərinin həyatı və irsi haqqında geniş elmi araşdırma aparılmalı, bu irs Azərbaycanın məqamına və alimlərinin İslam sivilizasiyasının qurulmasına verdiyi töhfələrə layiq şəkildə ensiklopediyada təqdim edilməlidir.
Bölmənin digər xəbərləri
