Azad edilmiş ərazilərdə su hövzələrinə balıq buraxılışı reintroduksiya layihələrinin bir istiqamətidir
Bakı, 3 mart, AZƏRTAC
Reintroduksiya layihələrinin təkcə Cəbrayılda deyil digər azad edilmiş ərazilərdə də həyata keçirilməsi nəzərdə tutulub. Nəcib maral, bezoar keçiləri, tirəndaz, köpgərin həmin ərazilərdə bərpası planlaşdırılıb.
AZƏRTAC xəbər verir ki, bunu Bioloji Müxtəlifliyin Qorunması Xidmətinin rəisi Firuddin Əliyev Ekologiya və Təbii Sərvətlər Nazirliyinin rəsmi feysbuk səhifəsində Ümumdünya Vəhşi Təbiət Günü ilə bağlı yayımlanan “Ekspert saatı”nda deyib.
F.Əliyevin sözlərinə görə, həmin ərazilərin su hövzələrində balıq populyasiyasının bərpası məqsədilə mütəmadi olaraq balıq buraxılışları da həyata keçirilir. Bu zaman xüsusi qiymətli növlərdən nərəkimiləri, qızıl xallı forel balıqlarına üstünlük verilir: “Ötən il ölkə üzrə 6 milyona yaxın balıq buraxılışı həyata keçirilib. Bu il həmin rəqəmi 6 milyondan çox olacağı gözlənilir. Proses hazırda davam edir. Sonuncu dəfə Laçın, Cəbrayıl və Masallıda balıq buraxılışları olub. Bu da reintroduksiyanın bir istiqamətidir. Əsasən burada yerli növlərə üstünlük verilir. Buraxılan həmin balıqlar Kiçik Qızılağac Balıqartırma Təsərrüfatında, həmçinin Xıllı Nərə Balıqartırma Zavodunda yetişdirilən balıq körpələridir. Çox vaxt sual da yaranır ki, niyə böyükölçülü balıqlar su hövzələrinə buraxılmır. Kiçikölçülü balıqlarda adaptasiya və həyatdaqalma daha güclü olduğu üçün məhz 20-25 qramlıq balıqlara daha çox üstünlük verilir”.
Bölmənin digər xəbərləri
