Azər Bağırov: Sanki “Araz-Naxçıvan” oyuna hazır deyildi, “Sabah” isə qol vurmaq istəmirdi
Bakı, 8 avqust, AZƏRTAC
Sanki “Araz-Naxçıvan” “Omoniya” ilə oyuna hazır deyildi.
Bu sözləri AZƏRTAC-a açıqlamasında futbol mütəxəssisi Azər Bağırov UEFA Konfrans Liqasının III təsnifat mərhələsində “Araz-Naxçıvan” və “Sabah”ın ilk oyunları barədə danışarkən deyib.
O, Naxçıvan təmsilçisinin məğlubiyyətini belə şərh edib: “Yadınızdadırsa, “Aris” Bakıdakı matçda müdafiədən oynayırdı. Onlar hər şeyi cavab görüşünə saxlamaq istəyirdilər. Lakin “Omoniya” tam fərqli oyun nümayiş etdirdi. Nikosiya klubu bütün diqqətini qol vurmağa yönəltmişdi. Bunun da nəticəsi olaraq “Araz-Naxçıvan”ın qapısından 4 top keçirdilər və ikinci matç öncəsi böyük üstünlük əldə etdilər”.
Mütəxəssis “Sabah”ın “Levski”i ilə səfər matçına heç-heçə üçün çıxdığını söyləyib: “Valdas Dambrauskasın komandası qol vurmaq istəmirdi. “Levski” isə əksinə, doğma meydanda qələbə üçün oynayırdı. Son saniyələrdə vurduqları qolla bunu bacardılar. Amma hələ heç nə bitməyib. Qarşıda cavab oyunları var”.
Qeyd edək ki, “Araz-Naxçıvan” rəqibinə 0:4, “Sabah” isə 0:1 hesabı ilə məğlub olub. Komandalar arasında cavab görüşləri avqustun 14-də təşkil olunacaq.
Bölmənin digər xəbərləri
