MƏDƏNİYYƏT
Azər Zeynalov: İstedadın peşəkarlıqla, zövqlə, hətta idrakla cilalanması ifaçılığın ən vacib proseslərindəndir - MÜSAHİBƏ
![Azər Zeynalov: İstedadın peşəkarlıqla, zövqlə, hətta idrakla cilalanması ifaçılığın ən vacib proseslərindəndir - MÜSAHİBƏ](/files/2023/3/1200x630/16972711701550913180_1200x630.jpg)
Xalq artisti oktyabrın 20-də Heydər Əliyev Sarayında “Bir son bahar” adlı solo konsert proqramı ilə çıxış edəcək
Bakı, 14 oktyabr, Abdulla Suvar, AZƏRTAC
Hər bir solo konsert əsl ifaçı üçün həm də bir imtahandır. Haqqında sizlərə söhbət açmaq istədiyim, milyonların sevimlisi olan, görkəmli ifaçı Azər Zeynalov belə imtahanlardan həmişə üzüağ çıxıb. O, hər ifası, hər solo konserti ilə bənzərsiz bir ifaçı olduğunu çoxdan təsdiqləyib. Onun qəlblərə hakim kəsilən ecazkar səsi və səmimi ifa tərzi dinləyicini məftunluq dərəcəsinə çatdırır. Azər Zeynalov sadəcə oxumur, həm də oxuduqlarını yaşayır və yaşadır. Çox zəngin repertuar sahibi olan A.Zeynalov xalq və bəstəkar mahnılarının əsl xiridarıdır. O, "Yar yaman aldatdı məni" məzəli xalq mahnısında yumoristik oxu tərzi, görkəmli bəstəkar Tofiq Quliyevin "Bəxtəvər oldum", "Sənə də qalmaz", "Azərbaycan", Emin Sabitoğlunun "Şükriyyə", "Gəncədən gəlirəm", Rauf Hacıyevin "Leyla", Vasif Adıgözəlovun "Qəm karvanı”, "Çanaqqala", "Qarabağ şikəstəsi", Sevil Əliyevanın "Əziz anam", Səyavuş Kəriminin "Sənsizləmişəm" və s. bu kimi qəlblərə nüfuz edib xoş, bəzən də kədərli ovqat yaradan mahnılarını özünün təfsirində son dərəcə ustalıqla çatdırır. Hazırda Xalq artisti yenə də ənənəsinə sadiq qalaraq böyük şövqlə növbəti solo konsertə hazırlaşır. Hazırlaşır ona görə ki, çoxlarının kumirinə çevrilmiş sevdirən və sevilən sənətkar olmağın məsuliyyətini bilir. Min bir zəhmətdən yoğurulan bu sənət məbədini həmişə pak və uca saxlamaq üçün o, hər bir ifasına ciddi yanaşır. Onunla söhbətimiz də elə yeni solo konserti ilə bağlı oldu. Oktyabrın 20-də Heydər Əliyev Sarayında “Bir son bahar” adlı solo konsert proqramı ilə çıxış edəcək Xalq artisti, professor Azər Zeynalov AZƏRTAC-ın suallarını cavablandırıb.
- Azər müəllim, niyə məhz “Bir son bahar”...
- Qeyd edim ki, mən konsertlərimi yalnız repertuarımda olan mahnıların adı ilə adlandırıram. Sözləri Xalq şairimiz Nigar Rəfibəyliyə, musiqisi tanınmış bəstəkarımız Faiq Sücəddinova məxsus olan “Bir son bahar” mahnısı dinləyicilər tərəfindən böyük məhəbbət və sevgi qazandığından, eyni zamanda da konsertimiz payız fəslinə təsadüf etdiyindən musiqili gecəmizi belə adlandırmağı məqsədəuyğun bildim.
-Gecədə hansı yeni mahnılarınızı təqdim edəcəksiniz?
-Hər konsertimdə yeni ifalar təqdim etməyi vacib sayıram. Proqram baxımından heç bir konsert özündən əvvəlkinin təkrarı olmamalıdır. Düzdür, elə əsərlər var ki, o əsərlər ifaçının vizit kartıdır və tamaşaçılar həmin ifaları daim eşitməyin arzusundadılar. Amma yeni mahnıların konsertdə səslənməsi vacib haldır və bu konsertimdə dinləyicilərə yeni ifalarımı da təqdim edəcəyəm.
-Axırıncı dəfə pərəstişkarlarınız qarşısında solo konsert proqramı ilə nə vaxt çıxış etmisiniz?
-Müxtəlif zamanlarda 5 solo konsertim olub. Amma ötən ildən silsilə konsertlər verməyi qərara almışam. Keçən ilin dekabr ayında, mənim doğum günümdə “Əsrin bir fəsli” adlı solo konsertim oldu. Bu konsert Üzeyir Hacıbəyli adına Bakı Musiqi Akademiyası nəzdində Opera Studiyasının Konsert salonunda keçirildi və konsertlər silsiləmin ilk nümunəsi oldu.
-Səhnəni tələbələrinizlə bölüşmək fikriniz varmı?
-Əslində, mənim gələcəkdə belə bir planım var. İfaçılıq sənətimizi təmsil edəcək gənclərin peşəkarlıq baxımından inkişafı müəllimlərdən çox asılıdır. Tək istedad hələ hər şey demək deyil. İstedadın peşəkarlıqla, zövqlə, hətta idrakla cilalanması ifaçılığın ən vacib proseslərindəndir. Bu amillərə gənc ifaçılar mütləq şəkildə yiyələnməlidirlər. Əlbəttə ki, biz də bir müəllim olaraq inkişaf etdirdiyimiz tələbələri dinləyicilərə tanıtmalıyıq.
-Qarşıda hansı planlarınız var?
-Bir opera ifaçısı olaraq yeni opera əsərlərində oynayacağam. Yeni mahnılar üzərində çalışıram. Bir də silsilə konsert proqramlarını hər il davam etdirməyi planlaşdırmışam. Bunlar mənim peşəmlə bağlı olan arzularımdır.
Biz də bu arzulara qoşulub sevimli sənətkarımıza yeni uğurlar arzuladıq.
Qeyd edək ki, Azər Zeynalov xalq, bəstəkar mahnılarını, romansları böyük sənətçilərə xas tərzdə oxuya bildiyi kimi, opera ariyalarını da böyük professionallıqla təqdim etməyi bacarır. “Liriko-dramatik tenor” səs tembrinə malik olan Azər Zeynalov 1996-cı ildən Azərbaycan Dövlət Akademik Opera və Balet Teatrının solistidir. O, Avropanın və Azərbaycanın klassik operalarında baş rolların ifaçısıdır. A.Zeynalov öz ifası ilə xeyli sayda xarici dövlətlərin böyük konsert salonlarında dəfələrlə çıxış edib. O, opera səhnəsində ifa etdiyi bir çox rollara görə müxtəlif mükafatlara da layiq görülüb. Azər Zeynalov 2001-ci ildən Azərbaycan Dövlət Mədəniyyət və İncəsənət Universitetində Vokal kafedrasının müdiri, 2015-ci ildən isə Musiqili teatr aktyoru kafedrasının müdiri kimi pedaqoji fəaliyyətdə olub. 2016-2017-ci tədris ilindən etibarən pedaqoji fəaliyyətini yalnız Azərbaycan Milli Konservatoriyasında davam etdirərək burada Milli vokal kafedrasına rəhbərlik edir. Onun 2012-ci ildə çap olunan "Vokal ifaçılığı" kitabı ali musiqi məktəblərində klassik opera-vokal ixtisası üzrə təhsil alan tələbələr üçün ana dilimizdə ilk dərslikdir.