AZƏRBAYCAN 10 İLDİR Kİ, BMT-NİN TAMHÜQUQLU ÜZVÜDÜR
On il bundan əvvəl - martın 2-də Azərbaycan Respublikası planetimizdə beynəlxalq sülhü və təhlükəsizliyi, insan haqlarını və azadlıqlarını müdafiə edən, millətlərarası münasibətləri bu məqsədlər üçün əlaqələndirən BMT-yə tamhüquqlu üzv qəbul olundu. Birləşmiş Millətlər Təşkilatına üzv seçilmək dövlətimizin müstəqilliyinin və suverenliyinin, toxunulmazlığının beynəlxalq aləmdə qeyd-şərtsiz tanınması demək idi.
Yenicə müstəqillik yoluna qədəm qoymuş Azərbaycanın BMT-dəki nümayəndəliyini o vaxt cəmi 5 diplomat təmsil edirdi. Martın 2-də Baş Assambleyanın iclas zalına dəvət olunan Azərbaycan nümayəndələri Ermənistanın ölkəmizə qarşı təcavüzü barədə bəyanat verdilər.
Amerikanın Azərbaycan Cəmiyyətinin prezidenti Tomris Azəri xatırlayır: Bizə BMT-nin binasına daxil olmaq üçün xüsusi buraxılış vərəqələri vermişdilər. Martın 2-də Azərbaycan bayrağı BMT-nin baş qərargahı qarşısında qaldırıldı. Həmin an biz - Azərbaycan diasporu nümayəndələri göz yaşlarımızı gizlədə bilmədik.
Biz sevinirik ki, müstəqil dövlət olaraq Azərbaycan BMT ilə əlaqələrini yüksək səviyyədə qurmuşdur. Bu əlaqələr, münasibətlər xüsusilə prezident Heydər Əliyevin Azərbaycanda 1993-cü ildə siyasi hakimiyyətə qayıdışından sonra yüksələn xətlə inkişaf etmişdir. Prezident Heydər Əliyevin 1994-cü ildə BMT-nin Baş Məclisinin sessiyasında iştirakı və həmin sessiyada söylədiyi tarixi nitqi Azərbaycan həqiqətlərinin dünyaya çatdırılması baxımından mühüm və həlledici rol oynadı.
1993-cü ildə BMT Ermənistan-Azərbaycan münaqişəsinə dair dörd qətnamə qəbul etmişdir. Həmin qətnamələrdə Təhlükəsizlik Şurası Azərbaycan Respublikasının ayrılmaz hissəsi olan Dağlıq Qarabağa və onun ətrafındakı rayonlara Ermənistan silahlı qüvvələrinin hücumunu pisləmiş, bu hücumların bölgədə sülhü və sabitliyi təhlükə altına aldığını vurğulamış, zəbt olunmuş torpaqlardan qoşunların qeyd-şərtsiz çıxarılmasını və məcburi köçkün düşən əhalinin evlərinə dönməsinə imkan yaradılmasını tələb etmişdir. Lakin Ermənistan bu günədək bu tələbi yerinə yetirməmişdir.
Azərbaycanın BMT-nin üzvü olduğu on il ərzində bu beynəlxalq təşkilatla əməkdaşlığımız xeyli genişlənmişdir. Azərbaycan çoxsaylı beynəlxalq konvensiyalara qoşulmuşdur.
BMT-dəki daimi nümayəndəliyimizin başçısı Yaşar Əliyev demişdir ki, biz BMT-dəki 6 əsas strukturdan biri olan İqtisadi və Sosial Şuraya üzv seçilməyi qarşıya məqsəd qoymuşuq. Baş Assambleyanın oktyabrda başlayacaq 57-ci sessiyası çərçivəsində keçiriləcək seçkilərdə həm Ermənistan, həm də Azərbaycan namizədliklərini irəli sürmüşdür. Bu istiqamətdə gündəlik intensiv iş aparırıq.
Diplomatın dediyi kimi BMT-də akkreditə olunmuş nümayəndələrimizin çiyninə ikiqat məsuliyyət düşür. Onlar beynəlxalq aləmdə baş verən bütün hadisələri diqqətlə izləməli, mübahisəli suallara dair öz ölkəsinin mövqeyini aydın etməli, xarici siyasətlə bağlı mürəkkəb problemlərə dair sorğulara dolğun cavab verməlidirlər.
Şəfəq Akifqızı
AzərTac-ın xüsusi müxbiri
Vaşinqton
Bölmənin digər xəbərləri
