Azərbaycan Ağsaqqallar Şurasının şəhər və rayon təşkilatlarında seçkilər davam edir
Bakı, 21 mart, AZƏRTAC
Şəhər və rayon Ağsaqqallar Şuralarında təşkilati məsələlərlə bağlı tədbirlərin keçirilməsi davam edir.
Ağsaqqallar Şurasından AZƏRTAC-a bildirilib ki, artıq Lənkəran, Yevlax, Hacıqabul, Şirvan və Bərdədə xüsusi karantin rejimi qaydalarına riayət olunmaqla iclaslar keçirilib. Son olaraq martın 17-də Azərbaycan Ağsaqqallar Şurasının sədr müavini, Milli Məclisin deputatı Eldar İbrahimovun iştirakı ilə İsmayıllı və Ağsuda, martın 18-də şuranın sədr müavini, professor Elmira Süleymanovanın iştirakı ilə Astarada, martın 18-i və19-da isə şuranın sədr müavini Bayram Yusifovun iştirakı ilə Gəncə, Samux, Daşkəsən və Göygöldə yerli təşkilatların tədbirləri təşkil edilib. Pandemiya ilə əlaqədar karantin rejiminin qaydalarına uyğun şəkildə maskadan istifadə olunaraq sosial məsafə gözlənilməklə azsaylı tərkibdə keçirilən bu toplantılarda ağsaqqallarla yanaşı şəhər, rayon rəhbərlikləri, ziyalılar və ictimaiyyətin nümayəndələri də iştirak ediblər.
Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri qoyaraq xatirəsini ehtiramla anıblar.
Toplantılarda Vətən müharibəsində həlak olmuş şəhidlərin və dünyasını dəyişmiş ağsaqqalların xatirəsi bir dəqiqəlik sükutla yad edildikdən sonra təşkilati məsələlərə baxılıb, yeni əsasnamələr qəbul edilib, şəhər və rayon Ağsaqqallar Şuralarının sədrləri seçilib. Həmçinin İsmayıllı, Ağsu, Astara, Gəncə, Samux, Daşkəsən və Göygöl Rayon Ağsaqqallar Şuralarının İdarə Heyətinin və Təftiş Komissiyalarının yeni tərkibi müəyyənləşdirilib.
İclaslarda çıxış edərək Azərbaycan Ağsaqqallar Şurasının sədri, Milli Məclisin deputatı, professor Eldar Quliyevin salamlarını tədbir iştirakçılarına çatdıran Respublika Ağsaqqallar Şurasının sədr müavinləri Eldar İbrahimov, Elmira Süleymanova və Bayram Yusifov yeni seçilmiş sədrləri, o cümlədən İdarə Heyətinin və Təftiş Komissiyalarının üzvlərini təbrik edərək gələcək fəaliyyətlərində uğurlar arzulayıblar. Onlar Prezident İlham Əliyevin apardığı uğurlu daxili və xarici siyasətdən, mükəmməl ordu quruculuğundan, ölkəmizin hərtərəfli inkişafından bəhs ediblər.
Bildirilib ki, xalqımızın yüksək vətənpərvərlik ruhu ilə Müzəffər Ali Baş Komandan İlham Əliyevin ətrafında yumruq kimi birləşməsi və onun başçılığı altında rəşadətli Ordumuzun nümayiş etdirdiyi möhtəşəm döyüş əzmi nəticəsində işğal altında olan müqəddəs torpaqlarımız qısa müddətdə - 44 gün ərzində azad edilib və artıq həmin torpaqlarımızda böyük vüsətlə quruculuq işləri gedir. Sonra natiqlər ulu öndər Heydər Əliyevin ağsaqqallara verdiyi yüksək dəyərdən, onları “milli-mənəvi dəyərlərimizin qızıl fondu” adlandırmasından söz açıblar. Vurğulanıb ki, hazırda Prezident İlham Əliyev və Birinci vitse-prezident Mehriban Əliyeva da bu ənənəyə böyük önəm verir, hər zaman ölkənin ağsaqqal və ziyalılarını diqqətdə saxlayır, onlara yüksək qayğı göstərirlər. Natiqlər, həmçinin ağsaqqalların üzərinə düşən məsuliyyətdən bəhs edərək, gənclərin dövlətə, xalqa sədaqət ruhunda, zərərli təsirlərdən uzaq və sağlam əsaslar üzərində tərbiyəsi işində ağsaqqallara hər zaman böyük ehtiyacın olduğunu tədbir iştirakçılarının diqqətinə çatdırıblar. Qeyd edilib ki, hazırda Azərbaycan Ağsaqqallar Şurasının sədri, millət vəkili Eldar Quliyevin başçılığı ilə təşkilat öz məhsuldar fəaliyyətini davam etdirir. Belə ki, şəhər və rayon ağsaqqallar şuralarında təşkilati məsələlərə baxılır, seçkilər keçirilir, ictimai əsaslarla yeni kadrlar işə cəlb olunur. Artıq təşkilatın yeni Nizamnaməsi qəbul edilib və rayonlar üçün hazırlanmış Əsasnamələr hal-hazırda qəbul olunur. Bundan əlavə, İdarə Heyətində 2021-2023-cü illər üçün Şuranın iş planı hazırlanıb və həyata keçirilir.
Tədbirlərdə çıxış edən Milli Məclisin deputatı Novruz Aslanov, İsmayıllı Rayon İcra Hakimiyyətinin başçısı Nahid Bağırov, Ağsu Rayon İcra Hakimiyyətinin başçısının birinci müavini Füzuli Kərimli, Astara Rayon İcra Hakimiyyətinin başçısı Qəzənfər Ağayev, Gəncə Şəhər İcra Hakimiyyətinin başçısı Niyazi Bayramov, Samux Rayon İcra Hakimiyyətinin başçısı Alı Qocayev, Daşkəsən Rayon İcra Hakimiyyətinin başçısının müavini Vüqar Məmmədov, Göygöl Rayon İcra Hakimiyyətinin başçısının səlahiyyətlərini müvəqqəti icraçısı, başçının birinci müavini Turani Əliyev və digər natiqlər də təşkilatın yeni seçilmiş tərkibini təbrik edərək onlara uğurlar arzulayıblar. Qeyd edilib ki, ağsaqqallar ölkəmizin mədəni-ictimai həyatında əhəmiyyətli rol oynayırlar. Dövlət başçısı İlham Əliyevin rəhbərliyi altında həyata keçirilən dinamik inkişaf prosesində onların fəaliyyəti danılmazdır. Şəhər və rayonların sosial-iqtisadi inkişafında da ağsaqqalların hər birinin böyük əməyi var. Həmçinin, çıxışlar zamanı Prezident İlham Əliyev və Birinci vitse-prezident Mehriban Əliyeva tərəfindən ağsaqqallara yüksək diqqət və qayğı göstərildiyi xüsusi vurğulanıb.
Sonda şəhər və rayonların yeni seçilmiş sədrləri, İdarə Heyətinin və Təftiş Komissiyasının üzvləri onlara göstərilmiş bu yüksək etimada görə tədbir iştirakçılarına öz minnətdarlıqlarını bildirib və bu etimadı doğrultmaq üçün əllərindən gələni əsirgəməyəcəklərinə söz veriblər.
Bölmənin digər xəbərləri
