Azərbaycan alimi Bolqarıstanda keçirilmiş Beynəlxalq konfransda məruzə ilə çıxış etmişdir
Bakı, 18 may (AZƏRTAC). Bolqarıstanın Svişov şəhərindəki D.A.Tsenov adına Biznes Akademiyasında “Kommersiya fəaliyyətinin müasir aspektləri: elm və praktika arasında əlaqə” mövzusunda Beynəlxalq elmi-praktiki konfrans keçirilmişdir.
Azərbaycan Turizm İnstitutundan (ATİ) AZƏRTAC-a bildirmişlər ki, konfransda ölkəmizi ATİ-nin turizm biznesinin təşkili və texnologiyası kafedrasının müdiri, dosent Bahadur Bilalov təmsil etmişdir.
Konfransın “Müasir iqtisadiyyatda turizm: reallıqlar və perspektivlər” bölməsində B.Bilalovun “Azərbaycan iqtisadiyyatında turizmin yeri: reallıq və perspektivlər” və “Böyük Qafqazın Zaqatala-Lahıc rayonunun turizm-rekreasiya potensialının qiymətləndirilməsi” mövzularında məruzələri dinlənilmişdir.
Dörd bölmə üzrə keçirilən konfransda 10 ölkədən 169 məruzə dinlənilmiş, müzakirələr aparılmışdır.
Bölmənin digər xəbərləri
