Azərbaycan alimləri NATO-nun xətti ilə keçirilən elmi sessiyada iştirak etmişlər
Bakı, 2 avqust (AZƏRTAC). Gürcüstanın İlya Dövlət Universitetində NATO-nun “Qafqazın seysmik təhlükələrə reaksiyası” layihəsi çərçivəsində çöl kəşfiyyat işləri ilə bağlı seminar təşkil edilmişdir.
Azərbaycan Milli Elmlər Akademiyasının Respublika Seysmoloji Xidmət Mərkəzindən (AMEA RSXM) AZƏRTAC-a bildirmişlər ki, çöl işləri ilə bağlı tədqiqatlar Gürcüstanın Samtsxe-Cavaxeti regionunda aparılmışdır.
Guralp CMG-6T seysmoqrafları ilə təchiz olunmuş 5 stansiyanın 2-si Azərbaycan tərəfindən quraşdırılmışdır. Sonda bu stansiyalar vasitəsilə alınmış seysmik məlumatlar təhlil olunmuşdur.
Eyni zamanda, Abuli gölü ətrafında geofiziki tədqiqat işləri yerinə yetirilmişdir. Geofiziki tədqiqatlar seysmik, elektrometriya və geolokasiya kəşfiyyat işlərindən ibarət olmuşdur.
Tədbirlərdə ABŞ, Türkiyə, Yunanıstan, Gürcüstan və Qırğızıstan alimləri iştirak etmişlər.
Azərbaycanı bu tədqiqat işlərində AMEA RSXM-in makroseysmik tədqiqatlar şöbəsinin müdiri Etibar Qaravəliyev, episental bölmənin müdiri Hidayət Tahirov və mərkəzin digər əməkdaşları təmsil etmişlər.
Bölmənin digər xəbərləri
