Azərbaycan Avropa çempionatında 19 cüdoçu ilə təmsil olunacaq
Bakı, 24 iyun, AZƏRTAC
İyunun 26–29-da Şimali Makedoniyanın paytaxtı Skopyedə cüdo üzrə yeniyetmələr arasında Avropa çempionatı keçiriləcək.
Cüdo Federasiyasından AZƏRTAC-a bildirilib ki, Azərbaycan turnirdə ümumilikdə 14 çəki dərəcəsində 19 idmançı (10 oğlan, 9 qız) ilə fərdi yarışlarda təmsil olunacaq.
Yığma turnirin son günündə qarışıq komanda yarışında mübarizə aparacaq.
Cüdoçulara yeniyetmə oğlanlardan ibarət yığmanın baş məşqçisi Emin İskəndərov, məşqçilər Nicat Şıxəlizadə ilə Kotaro Sasaki, yeniyetmə qızlardan ibarət millinin baş məşqçisi Elnur İsmayılov, məşqçi Əmrah Əhmədov rəhbərlik edəcək.
Oğlanlar arasında Anar Quliyev, İbrahim Talıbov (hər ikisi 50 kiloqram), Rəsul Əlizadə, Məhəmmədəli Hüsiyev (hər ikisi 55 kiloqram), Zeyd Ələsgərov (60 kiloqram), Əli Hümbətov (66 kiloqram), Səid Şərifov, Ayxan Həsənli (hər ikisi 73 kiloqram), Abdullah Rəhmətov (81 kiloqram), Səid Hüseynov (90 kiloqram) və Tunar Fərzəliyev (+90 kiloqram) qüvvəsini sınayacaq.
Qızların mübarizəsində isə Mədinə Hüseynova (40 kiloqram), Gülşən Hüseynova (44 kiloqram), Nərmin Ağamirzəzadə, Leyla Ələkbərova (hər ikisi 48 kiloqram), Aysun Məmmədova, Nuranə Hacızadə (hər ikisi 52 kiloqram), Səmayə Yusifli (57 kiloqram), Ayan Əliyeva (63 kiloqram) və Məsumə Məmmədli (70 kiloqram) tatamiyə çıxacaqlar.
Qitə birinciliyində Azərbaycan Cüdo Federasiyasının hakimlər heyətinin üzvü, “A” kateqoriyalı beynəlxalq dərəcəli hakim Akif Tahirov ədalət təmsilçiləri arasında yer alacaq.
Bölmənin digər xəbərləri
