Azərbaycan Avtomobil Yolları Dövlət Agentliyi yaşıllaşdırma aksiyası keçirib
Bakı, 25 dekabr, AZƏRTAC
Azərbaycan Avtomobil Yolları Dövlət Agentliyinin payız-qış mövsümündə həyata keçirdiyi tədbirlərdən biri də tabeliyindəki avtomobil yollarının mühafizə zolaqlarında yaşıllıq zolaqlarının salınmasıdır.
Bu barədə AZƏRTAC-a Azərbaycan Avtomobil Yolları Dövlət Agentliyindən bildirilib.
Bu məqsədlə agentliyin tabeliyindəki Yol Yaşıllaşdırma MMC-lərinin kollektivləri tərəfindən davamlı şəkildə ağacəkmə aksiyası keçirilir.
Məlumata görə, bu dəfə aksiya Bakı şəhərinin Zığ dairəsi-Hava Limanı avtomobil yolunun mühafizə zolağında keçirilib. Bir gündə yol kənarlarına 5000 ədəd Eldar şamı, zeytun ağacı, 2000 ədəd isə oleandra və sezalpin kol bitkisi, Bakı Dairəvi I yolunun kənarında isə 1000 ədəd Eldar şamı, 300 ədəd isə həmişəyaşıl kol bitkisi əkilib.
Ağacəkmə aksiyası respublika əhəmiyyətli avtomobil yollarının da mühafizə zolaqlarında keçirilib.
Belə ki, Bakı-Ələt-Qazax-Gürcüstan ilə dövlət sərhədi avtomobil yolunun Hacıqabul-Gəncə-Qazax hissəsinin, Bakı-Quba-Rusiya Federasiyası ilə dövlət sərhədi, Yevlax-Zaqatala-Gürcüstan ilə dövlət sərhədi, həmçinin Bakı-Ələt-Astara-İran İslam Respublikası ilə dövlət sərhədi avtomobil mühafizə zolaqlarına 45 min ədəd Eldar şamı, iydə, ağcaqayın, akasiya, sərv digər müxtəlif növ ağac əkilib. Əkilən ağaclara üzvi gübrə veriləcək.
Bölmənin digər xəbərləri
