AZƏRBAYCAN BASKETBOLÇULARI QƏLƏBƏ İLƏ BAŞLADILAR
Azərbaycan çempionu “Qala” klubu respublikamızın və Türkiyənin basketbol federasiyaları arasındakı qarşılıqlı razılığa əsasən, Avropa Kuboku uğrunda yarışa hazırlıq çərçivəsində qardaş ölkədə yoldaşlıq oyunları keçirir. Azərbaycan Basketbol Federasiyasından AZƏRTAC-ın müxbirinə bildirmişlər ki, səfər zamanı Rimas Kurtinaytisin komandası Türkiyə çempionatının birinci liqasının nümayəndələri “Maltepe” və “İşıqspor” klubları, yüksək liqanın təmsilçiləri “Qalatasaray” və “Tekelspor” klubları ilə yoldaşlıq görüşləri keçirməyi nəzərdə tutmuşdur.
Noyabrın 17-də “Qala” və “Maltepe” komandaları arasında ilk görüş olmuşdur. Oyun basketbolçularımızın tam üstünlüyü şəraitində keçmiş və 103:88 hesabı ilə başa çatmışdır. Noyabrın 18-də “Qala” “İşıqspor”, 19-da “Qalatasaray”, 20-də isə “Tekelspor” klubları ilə görüşəcəkdir.
Bölmənin digər xəbərləri
