Azərbaycan Beşinci İpək Yolu Beynəlxalq Forumunda təmsil olunacaq
Tbilisi, 20 oktyabr, AZƏRTAC
Oktyabrın 22-23-də Tbilisidə Beşinci İpək Yolu Beynəlxalq Forumu keçiriləcək.
Gürcüstanın Sənaye-Ticarət Palatasından AZƏRTAC-a bildiriblər ki, forumun əsas məqsədi İpək Yolu təşəbbüsünün təmsilçiləri, beynəlxalq təşkilatlar və özəl sektor nümayəndələri üçün əməkdaşlığın, beynəlxalq və regional ticarət əlaqələrinin dərinləşdirilməsi perspektivlərinin müzakirəsi məqsədilə platforma yaratmaqdır.
Forumda Baş nazir Əli Əsədovun rəhbərliyi etdiyi nümayəndə heyəti iştirak edəcək və Azərbaycanın Baş naziri forumun əsas spikerlərindən biri olacaq.
Tədbir Avropa və Asiya ölkələri arasında ticari-iqtisadi, siyasi və mədəni əlaqələrin möhkəmləndirilməsi baxımından ən yaxşı imkanlardan biri hesab edilir.
Forumda ticarətin asanlaşdırılması, elektron kommersiyanın inkişafı, rəqəmsal rabitə, nəqliyyat infrastrukturu və enerji sektorunun inkişafı və modernləşdirilməsi və s. aktual məsələlər müzakirə olunacaq.
Oktyabrın 22-də də rəsmi açılışdan sonra forum işini panel iclaslarla davam etdirəcək.
Forumda 1000-dən çox nümayəndənin iştirakı gözlənilir.
Tbilisi
Bölmənin digər xəbərləri
