Azərbaycan Dillər Universitetində “31 mart soyqırımı beynəlxalq aləmdə” mövzusunda tədbir keçirilmişdir
Bakı, 1 aprel (AZƏRTAC). Azərbaycan Dillər Universitetində (ADU) “31 mart soyqırımı beynəlxalq aləmdə” mövzusunda tədbir keçirildi.
ADU-nun mətbuat xidmətindən AZƏRTAC-a bildirmişlər ki, tədbir universitetin tələbə gənclər təşkilatı (TGT )və TGT-nin Vətənpərvərlər Klubunun təşəbbüsü ilə baş tutmuşdur. Tədbirdə universitetin Tərbiyə işləri üzrə prorektoru Ələddin Əliyev, Regionşünaslıq və Beynəlxalq münasibətlər fakültəsinin dekanı, dosent Məcid Əliyev, Azərbaycan tarixi, fəlsəfə və sosial-siyasi elmlər kafedrasının müdiri, dosent Ədalət Abdıyeva, kafedranın müəllimləri və tələbələr iştirak edirdi.
Əvvəlcə 31 mart soyqırımında həlak olan şəhidlərin ruhu bir dəqiqəlik sükutla yad edilmişdir. Tədbirdə ADU-nun tərbiyə işləri üzrə prorektoru Ələddin Əliyev 31 mart soyqırımının Azərbaycan xalqına qarşı ermənilər tərəfindən törədilmiş qanlı cinayətlərdən biri olduğunu bildirmişdir. Ermənistan neçə illərdir ki, vəhşiliklərini ört-basdır etmək, özlərini haqlı çıxartmaq üçün təbliğat aparır. Lakin xalqımızın başına gətirilən soyqırımı aktları Azərbaycanın uğurlu xarici diplomatiyası nəticəsində beynəlxalq səviyyədə bir sıra dünya dövlətləri tərəfindən artıq tanınmışdır. Ə.Əliyev bu istiqamətdə Azərbaycan Prezidenti İlham Əliyevin apardığı xarici siyasətin rolunu xüsusi qeyd etmişdir.
Professor Məhəmməd Teymurlu ümummilli lider Heydər Əliyevin 1998-ci il 26 mart tarixli Fərmanı ilə martın 31-nin “Azərbaycanlıların Soyqırımı Günü” kimi qeyd olunduğunu söyləmişdir. O, həmin dövrdə qana boyanmış Bakı küçələrinin dəhşətli mənzərəni xatırlatdığını deyərək xalqın başına açılan oyunları, ermənilərin S.Şaumyanın başçılığı ilə Bakı, Lənkəran, Kürdəmir və Qarabağın bir çox yerlərində azərbaycanlıları ucdantutma qırdıqlarını iştirakçıların nəzərinə çarpdırmışdır.
Sonra Azərbaycan tarixi, fəlsəfə və sosial-siyasi elmlər kafedrasının müəllimləri - dosent Qorxmaz Mustafayev, Şəlalə Bağırova və Ramil Quliyev Azərbaycan xalqının başına gətirilən bu soyqırımı haqqında tarixi faktları dilə gətirmişlər. Onlar məruzələrində həmin vaxt Bakıda və Azərbaycanın bir çox yerlərində, o cümlədən Quba, Şamaxı, Zəngəzur və Naxçıvanda azərbaycanlıların kütləvi şəkildə məhv edildiyini, olmazın işgəncələrə məruz qalan yüzlərlə uşağın, qocanın, qadının ermənilər tərəfindən ağır zülmlərə düçar olduqlarını bildirmişlər. Digər çıxış edənlər gənclərin bu faciələr barədə, xalqımızın başına gətirilən soyqırımı aktları ilə bağlı mütləq məlumatlı olmasının və bu istiqamətdə tariximizi daha dərindən öyrənməsinin vacibliyini önə çəkmişlər. Tələbə gənclər Heydər Əliyev Fondunun vitse-prezidenti Leyla xanım Əliyevanın təşəbbüsü ilə keçirilən “Xocalıya ədalət!” kampaniyası çərçivəsində bir sıra mühüm işlərin həyata keçirildiyini və xalqımızın əsrlər boyu başına gətirilən digər soyqırımı aktlarının da dünyaya çatdırılması üçün gənclərimizin üzərinə böyük məsuliyyət düşdüyünü dərk etdiklərini söyləmişlər. Bildirilmişdir ki, hər bir azərbaycanlı gənc, bütün tələbələr bu işdə bilik, bacarıq və dil vərdişlərindən faydalanaraq öz fəaliyyətini qurmalı və 31 mart soyqırımını beynəlxalq aləmdə tanıtmaq istiqamətində gücünü əsirgəməməlidirlər.
Bölmənin digər xəbərləri
