AZƏRBAYCAN DİNİ ETİQAD AZADLIĞININ OLDUĞU ÖLKƏDİR
Los-Ancelesdə ispan dilində çıxan ən iri “La Opinion” qəzetinin redaktoru Qabriel Lernerin “Los Angeles Jewish Journal” qəzetində dərc edilmiş və Azərbaycana həsr olunmuş məqaləsində Azərbaycan dini tolerantlıq baxımından dünyada ən liberal ölkə adlandırılır. Məsələn, məqalədə göstərilir ki, Azərbaycanda yaşayan və nümayəndələri müxtəlif qurumlarda yüksək səviyyədə təmsil olunmuş 12 min nəfərlik yəhudi icmasından bəhs edilir. Yəhudilər əsrlər boyu azərbaycanlılarla yanaşı yaşamış, Azərbaycan xalqının sevinc və kədərinə həmişə şərik olmuş, özlərini bu xalqın bir hissəsi hesab etmişlər.
Bakı və Xəzəryanı Yeparxiyanın yepiskopu Aleksandr atanın fikirləri də məqalənin ümumi ruhuna uyğundur. O demişdir ki, Azərbaycanda müxtəlif millətlərin həyat tərzi zəmanəmiz üçün optimal modeldir. Respublikada slavyan xalqlarının nümayəndələri - ruslar, ukraynalılar, belaruslar, polyaklar da mehriban ailə kimi yaşayırlar. Milli və dini mənsubiyyətindən asılı olmayaraq, ölkədə bütün insanlar arasında çox xoş münasibətlər mövcuddur.
Aleksandr atanın fikrincə, “milli və dini müxtəliflik, əslində, Azərbaycanın sərvətidir, bu diyarda yaşayan insanların gözəlliyini, təbiətin, dağların, dənizin gözəlliyini, tarixi ənənələrin zənginliyini göstərir. Əlbəttə, bütün bunlar həyatımızın reallıqlarıdır. Biz Allaha şükür edirik ki, bu ölkədə, bu cür gözəl xalqın arasında yaşayırıq”. Yepiskop Azərbaycanda
böyüklərə, qadınlara hörmət, çətin şəraitdə bir-birinə kömək etməyə çalışmaq kimi ənənələri də vurğulayır. O əmindir ki, dini baxımdan savadlı insan heç vaxt dini ekstremizmə uymaz, ictimai və siyasi həyata dissonans gətirməz. Yalnız dini baxımdan savadsız, cahil insanlar yolundan azır və son nəticədə ekstremizm kimi sürüşkən bir cığıra düşürlər.
Bakı katolik kilsəsinin rəhbəri Yan Qapla da bu fikrə şərikdir. O hesab edir ki, dindar insan başqasına dini zəmində nifrət bəsləyə, ona düşmən kəsilə bilməz, çünki müqəddəs kitabların heç biri bunu təbliğ etmir. Bu mənada yalnız “həmin kitablarda yazılanları düzgün başa düşməməkdən” söhbət gedə bilər.
Azərbaycanda yerli əhali və əcnəbi vətəndaşlar da nəzərə alınmaqla, katoliklərin sayı çox az, cəmi 300-400 nəfərdir. Lakin onların da dini tələbatının təmin edilməsi üçün Bakıda katolik kilsəsi tikilmişdir. Bu kilsənin tikilməsi üçün torpaq sahəsini ümummilli liderimiz Heydər Əliyev hədiyyə etmişdir. Kilsənin rəsmi açılış günü hələ müəyyən olunmamışdır, lakin Yan Qapla hesab edir ki, həmin gün artıq yaxındadır. O, ümidvar olduğunu bildirir ki, bu münasibətlə keçiriləcək təntənəli mərasimə Roma papasından sonra Vatikanın ən yüksək nümayəndəsi, dövlət katibi Tarçizio Bertone gələcəkdir. Bakı katolik kilsəsi rəhbərinin sözlərinə görə, Azərbaycan qədər diqqət yetirilən ölkə dünyada azdır. Lakin Azərbaycan da elə bir ölkədir ki, burada dini etiqad məsələsi tam azaddır. Dini liderlərin dini tolerantlığı dəstəkləməsi faktı, tolerantlığın daha da təkmilləşməsinə istiqamət verməsi Azərbaycan kimi çoxkonfessiyalı ölkə üçün, həqiqətən, çox vacib məqamdır.
Bölmənin digər xəbərləri
