AZƏRBAYCAN EKSPERT KOMİTƏSİNİN İCLASINDA TƏMSİL OLUNMUŞDUR
Fevralın axırı - martın əvvəlində Fransanın Bayon şəhərində ədalət mühakiməsinin səmərəliliyi üzrə ekspert komitəsinin “Vəkillərin müstəqilliyi” mövzusunda növbəti iclası keçirilmişdir. Respublikamızı Ali Məhkəmənin beynəlxalq əlaqələr şöbəsinin baş məsləhətçisi Məlahət Həsənova təmsil etmişdir.
Azərbaycan nümayəndəsinin hazırladığı məruzə iştirakçılar arasında rəsmi sənəd kimi paylanmışdır. Məruzədə bildirilir ki, Azərbaycanda hüquqi, demokratik dövlət qurmaq yolunda olduqca inamlı addımlar atılmış və bu məqsədlə bir sıra uğurlu islahatlar aparılmışdır. Həmin islahatlar içərisində məhkəmə-hüquq islahatları önəmli yer tutur. Respublikamızda ədalət mühakiməsini həyata keçirən məhkəmə sisteminə əvvəlkindən fərqli olaraq, Ağır Cinayətlərə Dair İşlər üzrə Məhkəmə, eyniadlı hərbi məhkəmə, iqtisad məhkəmələri, Apellyasiya Məhkəməsi kimi məhkəmələr daxil edilmişdir. Birinci instansiya, apellyasiya instansiyası və kassasiya instansiyası məhkəmələrindən ibarət üçpilləli məhkəmə sisteminin yaradılması vətəndaşların hüquq və azadlıqlarının etibarlı müdafiəsinə möhkəm təminat verir.
Məruzədə respublikamızda vətəndaşların hüquqlarının müdafiə olunmasında vəkillərin müstəqil müstəqil fəaliyyətinə hər cür şərait yaradılması, qanunvericilikdə çəkişmə prinsipinə xüsusi önəm verilməsi, tərəflərin məhkəmə qarşısında bərabər və tam hüquqda iştirakına imkanın daha da artırılması və s.də öz əksini tapmışdır.
Əsgər Əliyev
AZƏRTAC -ın xüsusi müxbiri
Paris
Bölmənin digər xəbərləri
