AZƏRBAYCAN GİMNASTLARI BEYNƏLXALQ TURNİRDƏ BÜRÜNC MEDAL QAZANMIŞLAR
Bakı, 8 iyun (AZƏRTAC). Azərbaycanın qrup komandası Polşada keçirilmiş Baltic Cup beynəlxalq turnirində bürünc medala layiq görülmüşdür.
Azərbaycan Gimnastika Federasiyasının mətbuat xidmətindən bildirmişlər ki, Vəfa Hüseynova, Valeriya Yeqay, Anastasiya Prosolova, Dina Qorina, Ceyla Quliyeva və Nigar Mirzəyevadan ibarət kollektiv 3 lent və 2 iplə hərəkətlərin finalında üçüncü yeri tutmuşdur.
Azərbaycan bədii gimnastika yığmasının baş məşqçisi Marina Vasilyevanın sözlərinə görə, sentyabrda Yaponiyada keçiriləcək dünya çempionatına qədər Sofiyanın məşhur “Levski” klubunda ay yarımlıq toplantı, sonra isə Burqas kurort şəhərindəki “Mladost” zalında məşqlər keçiriləcəkdir. Toplantıdan əvvəl və sonra komanda Amsterdamda keçiriləcək turnirdə və Minskdə təşkil olunacaq dünya kuboku yarışlarının mərhələsində iştirak edəcəkdir.
Polşada keçirilən fərdi turnirdə Samirə Mustafayeva yarışların iki finalında çıxış etmişdir. O, topla hərəkətlərdə 5-ci, iplə isə 8-ci olmuşdur. Mütləq hesabda Samirə 6-cı yeri tutmuşdur.
Bölmənin digər xəbərləri
