İDMAN
AZƏRBAYCAN GİMNASTLARI POLŞADA QIZIL MEDALLAR QAZANMIŞLAR
Azərbaycanın bədii gimnastika üzrə qrup komandası və yeniyetmə Nigar Əbdüsəlimova Polşada beynəlxalq turnirdə qızıl medallar qazanmışlar. Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, Vəfa Hüseynova, Anna Bitiyeva, Valeriya Yeqay, Alina Tryopina və Anastasiya Prasolovadan ibarət qrup 2 halqa və 4 gürz ilə hərəkətlərdə rəqibləri üçün əlçatmaz olmuşdur. Digər finalda beş iplə gimnastlar üçüncü, çoxnövcülükdə isə meydança sahiblərindən sonra ikinci olmuşlar.
Beynəlxalq turnirdə lentlə final hərəkətində Nigar Əbdüsəlimova birinci yeri tutmuş, daha bir azərbaycanlı gimnast Səidə Abdullayeva ikinci olmuşdur.
Bu turnir həm qruplar, həm də yeniyetmələr üçün iyunun 5-dən 7-dək Turində (İtaliya) keçiriləcək Avropa çempionatına hazırlıq xarekteri daşımışdır.