Azərbaycan gimnastları Portuqaliyadakı turniri 10 medalla başa vurublar
Bakı, 14 iyul, AZƏRTAC
Batut gimnastikası və tamblinq üzrə Azərbaycan millisinin üzvləri Portuqaliyanın Santarem şəhərində keçirilən “ScalabisCup 2025” turnirində yüksək nəticələr əldə ediblər.
Azərbaycan Gimnastika Federasiyasından AZƏRTAC-a verilən məlumata görə, tamblinq üzrə U-12 yaş kateqoriyasında Sənan Rzazadə 21.300 xalla qızıl, Əsnad Niftiyeva isə 18.600 xalla gümüş medal qazanıb. Böyüklər arasında çıxış edən Tofiq Əliyev, Bilal Qurbanov və Aleksey Karataşov 156.300 xalla komanda hesabında birinci olublar. Fərdi çıxışlarda isə Tofiq Əliyev 28.200 xalla ikinci, Bilal Qurbanov 26.400 xalla üçüncü yeri tutub.
Batut gimnastikası üzrə U-14 yaş kateqoriyasında Muhəmməd Həsənli 46.350 xalla, Fərhad Mustafayev isə 49.190 xalla fəxri kürsünün ən yüksək pilləsinə qalxıblar. Ammar Baxşalıyev 53.000 xalla gümüş, Nicat Mirzəyev isə 53.820 xalla bürünc mükafata sahib çıxıb.
İkili-mini batut üzrə yarışda da Ammar Baxşalıyev fərqlənib və 23.900 xalla üçüncü olub.
Bölmənin digər xəbərləri
