Azərbaycan-Gürcüstan ikitərəfli münasibətləri mükəmməl hüquqi bazaya malikdir
Bakı, 31 oktyabr, AZƏRTAC
Dövlətlər arasında münasibətlərin yaranması, əməkdaşlığın möhkəmlənməsi, dünya birliyinin inkişafı sahəsində məqsədlərə birgə nail olunması əsas məsələlərdən biri kimi diqqətdədir. Prezident İlham Əliyevin həyata keçirdiyi siyasət nəticəsində ölkəmizlə dünya dövlətləri arasında münasibətlər daha da sıxlaşır, iqtisadi, mədəni, siyasi münasibətlər müstəvisində uğurlar əldə olunur. Dünyanın bir çox ölkələri ilə yanaşı, Azərbaycanla Gürcüstan arasında əlaqələr də yüksələn bir xətlə inkişafdadır. İki ölkə arasında bu günə qədər imzalanmış sənədlər əməkdaşlıq üçün yeni imkanlar açıb.
Bunu AZƏRTAC-a açıqlamasında Yeni Azərbaycan Partiyası (YAP) Nəsimi rayon təşkilatının sədri Azər Süleymanov söyləyib.
O bildirib ki, Azərbaycanla Gürcüstan arasında yaxınlığın və əlaqələrin inkişafına böyük təkan verən ikitərəfli münasibətlər mükəmməl hüquqi bazaya malikdir. Bu münasibətlər həm siyasi, həm iqtisadi, həm də sosial-humanitar sahələri əhatə edir. Oktyabrın 24-də Prezident İlham Əliyevin Gürcüstana işgüzar səfərinin mövcud əlaqələrin davamlı xarakter daşımasına söykənməklə yanaşı, bu münasibətlərin möhkəmliyini bir daha təsdiq etmiş olduğunu diqqətə çatdıran Azər Süleymanov bu səfərin iki ölkə arasında münasibətlərin qurulmasının 30 illiyi ərəfəsinə təsadüf etdiyini də vurğulayıb. O deyib ki, Gürcüstan regionda Azərbaycanın ən yaxın müttəfiqlərindəndir. Prezident İlham Əliyev səfər çərçivəsində mətbuata bəyanatla çıxışı zamanı bu səfərin Gürcüstan və Azərbaycan arasındakı dostluq və qardaşlıq münasibətlərinə yeni təkan verəcəyini bildirib. Bu münasibətlərin çox dərin ənənələr üzərində qurulduğunu diqqətə çatdıran dövlətimizin başçısı əsrlər boyu xalqlarımızın dostluq, qardaşlıq, mehriban qonşuluq şəraitində yaşadıqlarını qeyd edib: “Dövlətlərarası əlaqələr də bu möhkəm təməl üzərində qurulubdur. Bu gün strateji tərəfdaşlıq əlaqələrimiz demək olar ki, müttəfiqlik səviyyəsinə qalxıbdır. Çünki bir çox sahələr üzrə biz fəal əməkdaşlıq edirik. Həm beynəlxalq təşkilatlar çərçivəsində daim bir-birimizi dəstəkləyirik, eyni zamanda, ikitərəfli formatda. Bir çox önəmli layihələr təkcə ölkələrimiz üçün deyil, bölgə üçün, bütövlükdə Avropa üçün xüsusi əhəmiyyət daşıyır”.
YAP Nəsimi rayon təşkilatının sədri deyib ki, Gürcüstanla Azərbaycanı, Bakı-Supsa, Bakı-Tbilisi-Ceyhan, Bakı-Tbilisi-Ərzurum və TRASEKA kimi qlobal enerji, nəqliyyat-kommunikasiya layihələri birləşdirir. Bununla paralel olaraq, GUAM, Qara Dəniz İqtisadi Əməkdaşlıq Təşkilatı və digər qurumlar daxilində əməkdaşlıq ikitərəfli strateji əlaqələri daha da möhkəmləndirib. Regionda yeni mühüm bir layihəni ərsəyə gətirmək üçün iki dövlətin mövqeləri üst-üstə düşür. Bütün sahələrdə uğurlu əlaqələr böyük layihələrin reallaşmasına səbəb olur və iki dövlət arasında olan dostluğun təməlini daha da möhkəmləndirir.
“Səfər çərçivəsində bir çox məsələlər müzakirə olunub. Dövlətimizin başçısının qeyd etdiyi kimi, ölkələrimiz arasında birgə icra olunan layihələr təkcə ölkələrimiz üçün deyil, bölgə üçün, bütövlükdə Avropa üçün xüsusi əhəmiyyət daşıyır. Qarabağ münaqişəsi başa çatandan sonra Azərbaycan və Ermənistan arasında sülh müqaviləsinin imzalanmasının labüdlüyünü bildirən Prezident İlham Əliyev Cənubi Qafqazda sülhün təmin edilməsindən və əməkdaşlıq imkanlarından danışıb”, - deyə A.Süleymanov qeyd edib.
O bildirib ki, bu gün Azərbaycanla Gürcüstan arasında siyasi, iqtisadi, ticari, mədəni və bir çox digər sahələrdə əməkdaşlıq münasibətləri dinamik inkişaf edir. "Bu ilin 9 ayında qarşılıqlı ticarət dövriyyəsi bir milyard dollara yaxınlaşıb. Əlbəttə ki, Azərbaycanın sərmayəsi ilə həyata keçirilən layihələr bizim əməkdaşlığımızı daha da gücləndirir. Azərbaycan Gürcüstana 3 milyard dollardan çox sərmayə qoyub. Bu sərmayə qarşılıqlı faydalı sərmayədir, çünki hər iki tərəfin maraqlarına cavab verir", - deyə Prezident qeyd edib. Gələcək enerji siyasəti ilə də bağlı geniş fikir mübadiləsi aparılıb. Dövlətimizin başçısı diqqətə çatdırıb ki, Azərbaycan dünya bazarlarına qaz ixracatını artırmaq fikrindədir.
“Azərbaycanla Gürcüstan arasında yaxınlığın və əlaqələrin inkişafına böyük təkan verən ikitərəfli münasibətlər göründüyü kimi, həm siyasi, həm iqtisadi, həm də sosial-humanitar sahələri əhatə edir. Həyata keçirilən layihələr qarşılıqlı münasibətləri daha da dərinləşdirəcək”, - deyə Azər Süleymanov vurğulayıb.
Bölmənin digər xəbərləri
