AZƏRBAYCAN İDMANÇILARI ŞAOLİN ÜZRƏ DÜNYA ÇEMPİONATINDA 12 QIZIL VƏ 5 GÜMÜŞ MEDAL QAZANMIŞLAR
Bakı, 8 iyun (AZƏRTAC). Misirin Hurqada şəhərində şaolin üzrə dünya çempionatı başa çatmışdır. Ölkəmizi Azərbaycan Şaolin Federasiyasının prezidenti, baş məşqçi Rafiq Əliyevin rəhbərliyi ilə 14 idmançı təmsil etmişdir. Onlar iki növ - tao-lyu (hərəkətlər kompleksi) və sanda (döyüş) üzrə çıxış etmişlər.
Yığmamız 12 qızıl və 5 gümüş medal qazanmışdır. Sanda yarışlarında Rüstəm Məmmədov (59 kiloqram), Ömər Balacayev (54 kiloqram), Qurban Hüseynov (63 kiloqram), Elvin Səfərov, Urxan Orucov (hər ikisi 67 kiloqram), Asif Sayadov (81 kiloqram), Ağacəfər Nəbiyev (60 kiloqram), tao-lyu yarışlarında isə Elvin Səfərov, Rauf Hacıyev, Natiq Qasımov, Tamerlan Rəhimli və Rauf Əliyev qızıl medala layiq görülmüşlər.
Sanda yarışlarında gümüş medala Tural Baratov (57 kiloqram), Ağacəfər Nəbiyev (60 kiloqram), Tural Məmmədli (63 kiloqram), Vüsal Şamxalov (71 kiloqram), Natiq Qasımov (90 kiloqramdan artıq) sahib olmuşlar.
2 qızıl medalın sahibi, Azərbaycan döyüşçüsü Elvin Səfərov dünya çempionatının ən güclü idmançısı seçilmişdir. Azərbaycan komandası bu nəticələrlə 27 ölkə arasında ikinci yeri tutmuşdur.
Xatırladaq ki, yığmamız bu idman növü üzrə dünya çempionatında ilk dəfə çıxış etmişdir.
Bölmənin digər xəbərləri
