AZƏRBAYCAN-KOREYA MÜNASİBƏTLƏRİNİN PERSPEKTİVLƏRİ MÜZAKİRƏ OLUNMUŞDUR
Fövqəladə hallar naziri Azərbaycanın sosial-iqtisadi inkişaf sahələrində qazandığı uğurlardan, ölkəmizin regionda həyata keçirdiyi irimiqyaslı enerji və nəqliyyat layihələrindən söz açmışdır. Nazir Azərbaycan Prezidenti İlham Əliyevin dəvəti ilə Koreyanın dövlət başçısı Ro Mu Hyunun bu ilin mayında ölkəmizə səfərinin bütün sahələrdə əlaqələrin daha da möhkəmlənməsinə səbəb olduğunu məmnunluqla dilə gətirmiş, səfər çərçivəsində imzalanan sənədlər arasında “Azərbaycan Respublikasının Fövqəladə Hallar Nazirliyi və Koreya Respublikasının Tikinti və Nəqliyyat Nazirliyi arasında tikinti sahəsində əməkdaşlıq barədə anlaşma memorandumu”nu irəliyə doğru atılan müsbət addım kimi dəyərləndirmişdir. O demişdir ki, tikinti sahəsində qabaqcıl texnologiyaları bölüşmək, elmi-tədqiqat və təcrübə-konstruksiya işləri aparmaq qarşılıqlı surətdə uğurların qazanılmasına gətirib çıxaracaqdır.
Müvəqqəti işlər vəkili Lyu Kvanq Çu da öz ölkəsinin Prezidentinin Azərbaycana səfərindən sonra dostluq münasibətlərinin dərinləşdirilməsi istiqamətində görülən işləri təqdir etmiş, bu günlərdə Koreyadan müxtəlif sahələri təmsil edən böyük nümayəndə heyətinin Bakıya gələcəyini bildirmişdir. O, Fövqəladə Hallar Nazirliyi ilə təkcə tikinti sahəsində deyil, həm də fövqəladə hallar sahəsində əməkdaşlığın perspektivləri barədə fikirlərini açıqlamışdır.
Görüşdə qarşılıqlı maraq doğuran məsələlər ətrafında fikir mübadiləsi aparılmışdır.
Bölmənin digər xəbərləri
