Azərbaycan-Macarıstan əməkdaşlığının intensivləşdirilməsi yolları müzakirə edilib
Budapeşt, 12 fevral, AZƏRTAC
Azərbaycanın Macarıstandakı səfiri Vilayət Quliyev bu ölkənin daxili işlər naziri, general-polkovnik Şandor Pinter və Budapeşt şəhərinin meri İştvan Tarloşla görüşüb.
Görüşlərdə ötən ilin noyabr ayında Azərbaycan Prezidenti İlham Əliyev və Macarıstanın Baş naziri Viktor Orban tərəfindən imzalanmış Azərbaycan Respublikası ilə Macarıstan arasında strateji tərəfdaşlıq haqqında Birgə Bəyannamədən, Bakı Şəhər İcra Hakimiyyətinin başçısı Hacıbala Abutalıbov və Budapeştin meri İştvan Tarloşun imzaladıqları Bakı Şəhər İcra Hakimiyyəti ilə Budapeşt Şəhər Meriyası arasında dostluq və əməkdaşlıq haqqında Protokoldan irəli gələn vəzifələr, qarşılıqlı əməkdaşlığın intensivləşdirilməsi yolları ətrafında müzakirələr aparılıb.
Səfir Vilayət Quliyev görüşlərdə bu il iyunun 12-28-də Bakıda keçiriləcək birinci Avropa Oyunlarına hazırlıq işlərinin gedişi barədə də məlumat verib. Həmçinin qarşılıqlı səfərlər mövzusunda fikir mübadiləsi aparılıb.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
