AZƏRBAYCAN MƏŞQÇİSİ HAKİMLİK DƏRƏCƏSİ ALMIŞDIR
Bədii gimnastika üzrə Azərbaycan yığma komandasının baş məşqçisi Valentina Ukleina hakimlik kateqoriyasının növbəti, III breve dərəcəsini almışdır. Bu qərar Beynəlxalq Gimnastika Federasiyasının (BGF) bədii gimnastika üzrə texniki komitəsinin Budapeştdə keçirilmiş iclasının yekunlarına əsasən qəbul edilmişdir. Azərbaycan Gimnastika Federasiyasından AZƏRTAC-ın müxbirinə bildirmişlər ki, bu dərəcə Valentina Ukleinaya bütün beynəlxalq yarışlarda, Qran-prilərin finallarında, Dünya kuboku yarışlarında və Avropa çempionatlarında hakimlik etmək hüququ verəcəkdir. Dünya çempionatlarında Azərbaycanı hakim kimi təmsil etmək üçün V.Ukleina daha bir mərhələ - beynəlxalq kurslar keçməlidir. Kursların gedişində məşqçi BGF texniki komitəsinə imtahan verməli və 20 turnirə hakimlik etməlidir.
Xatırladaq ki, Valentina Ukleina Azərbaycanda III breve almış ikinci milli hakimdir. Ondan əvvəl bu dərəcəyə Larisa Sidorova layiq görülmüşdür.
Bölmənin digər xəbərləri
