Azərbaycan millisinin baş məqçisi: Legioner futbolçu yerli oyunçu səviyyəsindədirsə, buraya gəlməsə yaxşıdır
Bakı, 14 iyul, AZƏRTAC
Yeni mövsümdə legioner limiti ləğv olunduğu üçün liqamızda əcnəbi futbolçuların sayı çox olacaq. Lakin transfer ediləcək legioner yerli oyunçu səviyyəsindədirsə, buraya gəlməsə yaxşıdır. Çünki gələcək futbolçular üst səviyyədə olmalı və liqaya maraq qatmalıdır.
Bu sözləri AZƏRTAC-a açıqlamasında Azərbaycanın U-17 millisinin baş məşqçisi Aqil Nəbiyev Premyer Liqa klublarının yay transferləri ilə bağlı danışarkən deyib.
Mütəxəssis bildirib ki, “Qarabağ”ın gətirdiyi oyunçular uğurlu ola bilər: “Bunu əminliklə söyləmək çətindir. Çünki həmin futbolçuların oyununu izləməmişəm. Lakin Qurban Qurbanovun oyunçu seçimi göz önündədir. Gətirdiyi legionlerin böyük əksəriyyəti uğurlu olub. Yassin Benzianın gedişi komanda üçün böyük itkidir. Marko Veşoviç haqqında isə bu fikirləri deyə bilməyəcəyəm. Çünki monteneqrolu oyunçu əsas heyətdəki yerini itirmişdi və əvvəlki formasında deyildi”.
Baş məşqçinin sözlərinə görə, Elmar Baxşıyev “Araz-Naxçıvan”, Rəşad Sadıqov isə “Zirə” üçün yaxşı futbolçular seçib: ”Qarabağ”dan bizə tanış iki sima – Patrik Andrade və Hamidu Keytanın Naxçıvan təmsilçisinə transferi düzgün addım idi. Hər iki futbolçu liqamızı yaxşı tanıyır. Həmçinin Rəşaq Sadıqov da özünə tanış adları “Zirə”yə cəlb edib. Vinsent Tilli “Sabah”da ondan gözləniləni verməsə də, “qartallar”ın heyətində öz adından söz etdirə bilər. Futbol elədir ki, bir klubda özünü yaxşı tərəfdən göstərməyib, başqa komandada əla çıxış edə bilərsən. Yəqin ki, baş məşqçi onda hansısa potensialı görüb”.
A.Nəbiyev “Sabah”, “Neftçi” və “Sumqayıt”ın yeni mövsümə hazırlıqları barədə də danışıb: “Sabah” avrokuboklara görə mövsümü erkən açdı. Sloveniyanın “Selye” komandasına qarşı oyuna da baxdım. Transferlər barədə indidən nəsə demək düzgün çıxmaz. Hansısa futbolçuya bir oyunla qiymət vermək çətindir. Samir Abasov “Neftçi”də əzmkar kollektiv quracaq. Bu, onun əsas prinsiplərindən biridir. “Sumqayıt”a serbiyalı tanınmış mütəxəssis Saşa İliç gətirildi. Onun futbolçu və məşqçilik təcrübəsi komandaya xeyir verəcək”.
Mütəxəssis bölgə klublarının da transferdə fəallıq göstərdiyini söyləyib: ”Karvan” və “İmişli” uzun, “Qəbələ” isə 1 illik fasilədən sonra Premyer Liqaya qayıtdı. “Qırmızı-qaralar” bölgə klubları arasında infrastrukturu yaxşı olan komandadır. “Turan Tovuz” da futbol üçün yaxşı sərmayə ayırıb. “Kəpəz”də dirçəliş hiss olunur. Ayxan Abbasov “Şamaxı”da gənc və legionerlərdən ibarət yaxşı heyət qurmağa çalışır. Əgər region komandasının yaxşı maliyyəsi yoxdursa, Premyer Liqada oynamağı mənasızdır. Hazırda “İmişli” və “Karvan” bu baxımdan bir az sıxıntı çəkir”.
Bölmənin digər xəbərləri
