Azərbaycan Minifutbol Federasiyasının prezidenti: Bu tarixi uğur dövlətimizin dəstəyi sayəsində ərsəyə gəldi
Bakı, 2 iyun, AZƏRTAC
Düşüncələrimizi sözlə ifadə etmək çətindir. Azarkeşlərimizə və xalqımıza dəstəyə görə təşəkkür edirəm.
Bu sözləri AZƏRTAC-a açıqlamasında Azərbaycan Minifutbol Federasiyasının prezidenti Orxan Məmmədov Azərbaycan millisinin Bakıda keçirilən dünya çempionatında qalib olması barədə danışarkən deyib.
Funksioner bildirib ki, milli komanda azarkeşlərin də möhtəşəm dəstəyi sayəsində bunu reallaşdırdı: “Yığmamız turnir ərzində demək olar ki, səhvsiz irəlilədi. Macarıstana qarşı final görüşündə də əla mübarizə apardı”.
O.Məmmədov ən böyük dəstəyə görə Prezident İlham Əliyevə təşəkkür edib: “Əlbəttə ki, bu tarixi uğur dövlətimizin başçısı İlham Əliyevin xeyir-duası, Azərbaycan Minifutbol Federasiyasına olan dəstəyi sayəsində ərsəyə gəldi. Biz bu işi məhz dövlətin maliyyə və infrastruktur baxımından dəstəyi ilə bacardıq. Prezident İlham Əliyev hər zaman idmana qayğı göstərir. Bundan sonrakı məqsədimiz uşaqları bu idman növünə cəlb etmək və yeni uğurlar qazanmaqdır”.
Qeyd edək ki, Azərbaycan millisi finalda Macarıstana 4:2 hesabı ilə qalib gələrək dünya çempionu olub.
Bölmənin digər xəbərləri
