AZƏRBAYCAN NÜMAYƏNDƏ HEYƏTİ MEKSİKADA BEYNƏLXALQ KONFRANSDA İŞTİRAK EDƏCƏK
İqtisadi inkişaf və xarici işlər nazirliklərinin təmsilçilərindən ibarət nümayəndə heyəti Birləşmiş Millətlər Təşkilatının himayəsi ilə martın 18-22-də Meksikanın Monterrey şəhərində keçiriləcək beynəlxalq konfransda iştirak edəcəkdir.
BMT-nin Azərbaycan nümayəndəliyinin mətbuat üçün yaydığı məlumatda deyilir ki, qlobal inkişafın maliyyə məsələlərinin həlli ilə bağlı bu ilk konfransda Dünya Bankı, Beynəlxalq Valyuta Fondu, Dünya Ticarət Təşkilatı kimi nüfuzlu qurumların rəhbərləri iştirak edəcəklər.
Konfransda müzakirə ediləcək əsas məsələlər hələ 1999-cu ildə BMT Təhlükəsizlik Şurasının qətnaməsində müəyyənləşdirilmişdir. Bunların arasında qloballaşma şəraitində inkişafın maliyyələşdirilməsi sahəsində beynəlxalq və milli məsələlərin kompleks və sistemli həlli yollarının axtarılması və BMT-nin konfransında və zirvə görüşlərində qarşıya qoyulmuş məqsədlərə nail olmaq üçün maliyyə vəsaitinin təminatı məsələləri də var.
Müzakirəyə çıxarılan əsas məsələlərdən biri də yoxsulluğun azaldılması olacaqdır. BMT-nin baş katibi Kofi Annan bununla əlaqədar demişdir:” Əgər biz həm dövlət, həm də bazar münasibətlərinin iştirakçılarıi hesabına daha çox vəsait cəlb etməyə nail olmasaq, yoxsulluğun azaldılmasına və sürətli inkişafa dair planlarımız əngəllərlə rastlaşacaqdır”.
Bölmənin digər xəbərləri
