Azərbaycan nümayəndə heyəti ABŞ-da keçiriləcək Amerika-Azərbaycan Ticarət Palatasının illik konfransında iştirak etmək üçün martın 5-də Vaşinqtona yola düşmüşdür. Nümayəndə heyətinə ölkəmizin informasiya texnologiyası, telekommunikasıya, səhiyyə, tikinti, ərzaq məhsullarının istehsalı və qablaşdırlması üzrə şirkətlərinin mütəxəssisləri daxildirlər.

Birləşmiş Ştatların Bakıdakı səfirliyindən bildirmişlər ki, ABŞ ticarət departamenti Azərbaycan nümayəndələrinin bu ölkədəki potensial tərəfdaşları ilə görüşlərini də təşkil edəcəkdir. ABŞ Ticarət və İnkişaf Agentliyi bu səfər üçün qrant ayırmışdır.

ABŞ-ın Azərbaycandakı səfiri Ross Uilson bildirmişdir ki, 907-ci düzəlişdən irəli gələn məhdudiyyətlərin aradan qaldırılması ABŞ-Azərbaycan əlaqələrində yeni səhifə açmışdır. Amerika və Azərbaycan şirkətləri üçün sərfəli işgüzar əlaqələr yaratmaq bizim münasibətlərimizdə mühüm istiqamətlərdən biridir. Səfir Amerika-Azərbaycan Ticarət Palatasının Vaşinqtonda keçiriləcək illik konfransını amerikalı tərəfdaşlarla ünsiyyət üçün yaxşı imkan kimi dəyərləndirmişdir.

ABŞ səfirliyi ölkələrimiz arasında diplomatik münasibətlər yaradılmasının 10-cu ildönümü ilə əlaqədar bir sıra tədbirlər nəzərdə tutmuşdur. Bura ticarət sərgilərinin təşkili, işgüzar tərəfdaşlarla görüşlər keçirilməsi, Azərbaycanın müxtəlif rayonlarında Amerika-Azərbaycan əməkdaşlığının yeni sahələrinin müəyyən edilməsi və s. daxildir.