AZƏRBAYCAN NÜMAYƏNDƏLƏRİ YENİYETMƏLƏRİN BEYNƏXALQ İDMAN OYUNLARINDA İŞTİRAK EDƏCƏKLƏR
Bu il iyunun 15-23-də Moskvada Rusiya paytaxtı hökumətinin təşəbbüsü ilə MDB və Baltikyanı ölkələrin Yeniyetmələrin beynəlxalq idman oyunları keçiriləcəkdir. Bunu fevralın 13-də Moskva meriyasında keçirilən mətbuat konfransında merin birinci müavini Lyudmila Şvetsova bildirmişdir. O demişdir ki, tədbirin keçirilməsi MDB-nin Hökumət Başçıları Şurası tərəfindən bəyənilmiş və bütün dövlətlər bu yarışlarda iştirak etmək istədiklərini açıqlamışlar.
Təşkilat komitəsinin üzvü, Moskva İdman Komitəsinin sədri Sergey Korol AZƏRTAC-ın müxbirinə bildirmişdir ki, bu yarışlarda Azərbaycan idmançıları da mübarizə aparacaqlar. Azərbaycan Gənclər, İdman və Turizm Nazirliyi ilə ilkin razılaşmaya görə, respublikamızı 18 yaşınadək olan 148 yeniyetmə idmançı təmsil edəcəkdir. Onlar idmanın 12 növündə yarışacaqlar.
Oyunlarda 5800 idmançının iştirak edəcəyi gözlənilir.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
