Azərbaycan parlamenti 9 məsələni müzakirə edib, mühüm qərarlar qəbul olunub YENİLƏNİB
Bakı, 1 may, AZƏRTAC
Mayın 1-də Sahibə Qafarovanın sədrliyi ilə Milli Məclisin yaz sessiyasının növbəti plenar iclası keçirilib.
AZƏRTAC xəbər verir ki, iclasda 9 məsələnin müzakirə ediləcəyini bildirən Milli Məclisin sədri birinci məsələnin Avropa Parlamentinin Azərbaycan əleyhinə fəaliyyəti barədə olduğunu deyib.
O diqqətə çatdırıb: “Bildiyiniz kimi, Prezident İlham Əliyevin həyata keçirdiyi uzaqgörən xarici siyasət dövlətimizi beynəlxalq birliyin nüfuzlu bir üzvünə çevirib. Biz xarici siyasətimizdə dövlətlərin ərazi bütövlüyünə, suverenliyinə hörmət, daxili işlərinə qarışmama prinsiplərini rəhbər tutur, beynəlxalq qurumlar ilə konstruktiv iş birliyini inkişaf etdiririk. Bu baxımdan ölkəmiz Avropa Parlamenti ilə əməkdaşlıq mexanizmlərini həmişə konstruktiv dialoq platforması kimi nəzərdən keçirib”.
Milli Məclisin sədri təəssüflə qeyd edib ki, ölkəmizdə və regionumuzda baş verən proseslərə Avropa Parlamentinin yanaşmalarında mövcud olan problemlər böyük narazılıq və narahatlıq doğurur. Bu proses uzun illərdir ki, davam edir. Avropa Parlamentinin ölkəmizlə bağlı qəbul etdiyi qətnamələr birtərəfli və qərəzli xarakter daşıyır, ikili standartlara əsaslanır. Bu sənədlər real vəziyyəti əks etdirmir və çox vaxt Azərbaycanın qanuni maraqlarını pozmağa yönəlir.
Məsələ ətrafında müzakirələrdə çıxış edən deputatlar Avropa Parlamentinin “Ermənistanda demokratik dayanıqlığın dəstəklənməsi” adlı qətnamə qəbul edərək, növbəti dəfə Azərbaycanı hədəfə aldığını, ölkəmizə qarşı səslənən riyakar iddiaların əsassız, mövcud reallıqdan uzaq olduğunu, sənəddə göstərilənləri qətiyyətlə rədd etdiklərini söyləyiblər. Qeyd edilib ki, qurumun regionda postmüharibə dövründə formalaşan sülh səylərini dəstəkləmək əvəzinə, qarşıdurma mövqeyi sərgiləməsi sülh prosesinə, Azərbaycan-Avropa İttifaqı münasibətlərinə mənfi təsir göstərir.
İclasda Milli Məclis sədrinin müavini Ziyafət Əsgərov Avropa Parlamentinin Azərbaycan əleyhinə fəaliyyəti ilə əlaqədar Milli Məclisinin Qərarını oxuyub.
Sonra Milli Məclisin qərar layihəsi səsə qoyularaq qəbul edilib.
Sahibə Qafarova növbəti 3 məsələnin Prezidentin bir məktubu ilə Milli Məclisə daxil olduğunu nəzərə çatdırıb. O, hər üç qanun layihəsinin beynəlxalq sənədlərin təsdiqi ilə bağlı olduğunu deyib və “Normativ hüququ aktlar haqqında” Konstitusiya Qanununun tələbinə əsasən həmin sənədlərin bir oxunuşda qəbul ediləcəyini bildirib.
Sonra Hüquq siyasəti və dövlət quruculuğu komitəsinin üzvü Nizami Səfərov “Mülki, ailə və cinayət işləri üzrə hüquqi yardım və hüquqi münasibətlər haqqında 1993-cü il 22 yanvar tarixli Konvensiyaya dəyişikliklərin edilməsi barədə Protokol”un təsdiq edilməsi haqqında qanun layihəsini təqdim edib.
Məsələ ətrafında müzakirələrdə çıxış edənlər sənədin əhəmiyyəti barədə öz fikirlərini bölüşüblər. Qanun layihəsi səsə qoyularaq qəbul edilib.
Daha sonra deputat Nizami Səfərov “Mülki, ailə və cinayət işləri üzrə hüquqi yardım və hüquqi münasibətlər haqqında 2002-ci il 7 oktyabr tarixli Konvensiyaya dəyişikliklərin edilməsi barədə Protokol”un təsdiq edilməsi haqqında qanun layihəsi barədə məlumat verib. Qanun layihəsi səsə qoyularaq qəbul edilib.
Daha sonra Hüquq siyasəti və dövlət quruculuğu komitəsinin üzvü Nizami Səfərov “Məhkəmə aktlarının, digər səlahiyyətli orqanların və vəzifəli şəxslərin aktlarının məcburi icrası həyata keçirilərkən məlumat mübadiləsi üzrə əməkdaşlıq haqqında Saziş”in təsdiq edilməsi barədə qanun layihəsindən danışıb. Qanun layihəsi səsə qoyularaq qəbul edilib.
Sahibə Qafarova gündəliyin növbəti 2 məsələsinin üçüncü oxunuşda qanun layihələri olduğunu söyləyib.
Sonra Əmək və sosial siyasət komitəsinin sədri Musa Quliyev Əmək Məcəlləsində və “Gender (kişi və qadınların) bərabərliyinin təminatları haqqında” Qanunda dəyişiklik edilməsi barədə qanun layihəsini (üçüncü oxunuş) təqdim edib.
Komitə sədri layihə barədə birinci və ikinci oxunuşlarda ətraflı məlumat verildiyini, məsələnin komitədə üçüncü oxunuşda müzakirəsi zamanı əlavə təklifin daxil olmadığını, sənədin mətnində dəyişikliyin edilmədiyini deyib və onun səsə qoyulmasını xahiş edib. Qanun layihəsi üçüncü oxunuşda qəbul olunub.
Daha sonra Hüquq siyasəti və dövlət quruculuğu komitəsinin sədri Əli Hüseynli “Yol hərəkəti haqqında” Azərbaycan Respublikasının Qanununda dəyişiklik edilməsi barədə qanun layihəsi ilə bağlı (üçüncü oxunuş) məlumatı diqqətə çatdırıb. Qanun layihəsi üçüncü oxunuşda qəbul edilib.
Milli Məclisin sədri gündəliyin qalan 3 məsələsinin birinci oxunuşda təqdim olunan qanun layihələri olduğunu bildirib. O, deputatlardan müzakirələrdə birinci oxunuşun tələblərinə riayət etməyi xahiş edib.
İqtisadi siyasət, sənaye və sahibkarlıq komitəsinin sədri Azər Əmiraslanov layihə barədə məlumat verərək bildirib ki, sənəd yalnız normativ bazanın yenilənməsini deyil, bütövlükdə gömrük sisteminin keyfiyyətcə yeni mərhələyə keçidini təmin edən konseptual yanaşmanı əks etdirir. Qeyd olunub ki, layihə Gömrük Məcəlləsini beynəlxalq ticarət münasibətlərinin müasir tələblərinə uyğunlaşdırır və nəticə etibarilə gömrük sistemində yeni bir səhifə açır.
Dövlət Gömrük Komitəsinin sədri Şahin Bağırov deputatların söylədikləri fikirlərə münasibət bildirdikdən sonra, qanun layihəsi səsə qoyularaq birinci oxunuşda qəbul edilib.
Sonra Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev “Hərbi xidmətkeçmə haqqında” Əsasnamənin təsdiq edilməsi barədə” və “Hərbi vəzifə və hərbi xidmət haqqında” qanunlarda dəyişiklik edilməsi barədə qanun layihəsi (birinci oxunuş) ilə bağlı məlumat verib. Qanun layihəsi birinci oxunuşda qəbul edilib.
Gündəliyin sonuncu məsələsi olan “Vətəndaşların müraciətləri haqqında” Qanunda dəyişiklik edilməsi barədə qanun layihəsi (birinci oxunuş) ilə bağlı İnsan hüquqları komitəsinin sədri Zahid Oruc məlumat verib. Qanun layihəsi səsə qoyularaq birinci oxunuşda qəbul olunub.
Bölmənin digər xəbərləri
