RƏSMİ XRONİKA
AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli Vladimir Nikolayeviç!
Hörmətli qonaqlar!
Xanımlar və cənablar!
Mən Moldova Prezidentini bir daha Azərbaycanda salamlamaq və bu gün aparılmış danışıqlardan dərin məmnunluğumu bildirmək istərdim.
Ölkələrimiz arasında dialoq çox uğurla davam edir, getdikcə yeni sahələri əhatə edir. Bizim ölkələr dost ölkələrdir, tərəfdaş ölkələrdir və biz geniş əhatəli məsələlər üzrə fəal qarşılıqlı əlaqə saxlayırıq. Siyasi dialoq çox fəaldır. Bu gün biz ikitərəfli münasibətlərə aid məsələləri, regional məsələləri müzakirə etdik. İqtisadi əlaqələrin intensivləşdirilməsinin zəruri olması xüsusi vurğulandı. Bu istiqamətdə böyük potensial imkanlar var. Biz energetika sahəsində əməkdaşlıq məsələlərini və investisiya layihələrinin mümkünlüyünü müzakirə etdik.
Humanitar sahədə əməkdaşlığa böyük diqqət yetirildi. Bildiyiniz kimi, bu gün Azərbaycanda Moldova mədəniyyəti günləri açılır. Əminəm ki, bu günlər ərzində ölkəmizin vətəndaşları Moldovanın bənzərsiz mədəniyyəti və incəsənəti ilə yaxından tanış ola biləcəklər.
Bütövlükdə bizim münasibətlərimizi tərəfdaşlıq münasibətləri, çox yaxın münasibətlər kimi səciyyələndirmək olar və bu, bizi çox sevindirir. Moldova Prezidentinin Azərbaycana səfəri əlaqələrimizin inkişafına yeni impuls, yeni təkan verir. Bizim çox güclü müqavilə - hüquqi bazamız var, qarşılıqlı iqtisadi əlaqələri fəallaşdırmaq, əmtəə dövriyyəsini artırmaq və birlikdə həyata keçirə biləcəyimiz konkret layihələri çox ətraflı şəkildə nəzərdən keçirmək arzumuz var.
Biz ölkələrimizdə mövcud olan münaqişələrin tənzimlənməsi məsələlərini də müzakirə etdik və əlbəttə, hər iki tərəf eyni fikirdədir ki, bu münaqişələr ölkələrimizin ərazi bütövlüyü çərçivəsində həll olunmalıdır. Biz çox şadıq ki, dünya birliyi bizim mövqelərimizi dəstəkləyir. Münaqişələrin həlli regional əməkdaşlığa daha böyük təkan verəcək, potensial separatizm təhlükəsi mənbələrini aradan qaldırmağa və regionda qarşılıqlı əlaqələri daha geniş əsasda sahmana salmağa imkan verəcəkdir.
Bir çox məsələlərdə bizim mövqelərimiz üst-üstə düşür. Bu gün mən işğal edilmiş ərazilərdə vəziyyət barədə məsələ ilə əlaqədar BMT-nin Baş Məclisində Moldova Azərbaycanın mövqeyini dəstəklədiyinə görə Vladimir Nikolayeviçə xüsusi minnətdarlığımı bildirdim. Bildiyiniz kimi, Baş Məclis Azərbaycanı dəstəkləmiş və bizim təklif etdiyimiz qətnaməni qəbul etmişdir. Bizi fəal surətdə dəstəkləyən və öz prinsipial mövqeyini ifadə edən ölkələr arasında dost Moldova da var idi. Biz bunu çox yüksək qiymətləndirir və prinsipial mövqeyin, prinsipial xarici siyasət xəttinin təzahürü, eləcə də bizi birləşdirən yaxın dostluq əlaqələrinin ifadəsi hesab edirik.
Mən əminəm ki, uğurla başlanmış bu səfər uğurla da davam edəcək və münasibətlərimizin gələcək inkişafına güclü təkan verəcəkdir.
Diqqətinizə görə sağ olun.
######