AZƏRBAYCAN RESPUBLİKASI XARİCİ İŞLƏR NAZİRLİYİNİN BƏYANATI
Suveren Gürcüstanın ayrılmaz hissəsi olan Abxaziyada bu il martın 2-də “parlament seçkiləri” deyilən seçkilər keçirilmişdir.
Azərbaycan Respublikası dövlətlərin suverenliyi, ərazi bütövlüyü, sərhədlərinin toxunulmazlığı, zor işlədilməməsi və ya zor işlətməklə hədələməmək, mübahisələrin dincliklə nizama salınması prinsiplərini əsas tutaraq, münaqişə zonalarında keçirilən və gərginliyin artmasına gətirib çıxara, nizamasalma prosesini çətinləşdirə biləcək qanunsuz “seçkilər”dən narahat olduğunu bildirir.
Azərbaycan Respublikası ərazilərin qəsb edilməsini, etnik təmizləmələri və demoqrafik vəziyyətin süni surətdə dəyişdirilməsini heç vaxt və heç bir vəchlə tanımamışdır və tanımır. Azərbaycan Respublikası nizamasalma üçün əsas ola bilməyən “baş vermiş fakt” praktikasını pisləyir və nəzərə çarpdırır ki, nə münaqişə zonasında indiki vəziyyət, nə də bu vəziyyətin möhkəmləndirilməsinə yönəldilmiş hərəkətlər qanuni sayıla bilməz.
Azərbaycan Respublikası hesab edir ki, bu cür münaqişələr beynəlxalq hüququn yuxarıda göstərilən norma və prinsipləri, BMT Təhlükəsizlik Şurasının müvafiq qətnamələri və ATƏT-in qərarları əsasında nizama salınmalıdır.
Bakı, 27 mart 2002-ci il.
Bölmənin digər xəbərləri
