AZƏRBAYCAN RESPUBLİKASININ NAZİRLƏR KABİNETİNDƏ
“Dövlət rüsumu haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2001-ci il 26 dekabr tarixli Fərmanının icrasını təmin etmək məqsədi ilə Nazirlər Kabineti qərara almışdır ki, Nazirlər Kabinetinin aşağıdakı qərarlarına dəyişikliklər edilsin:
Azərbaycan Respublikası Nazirlər Kabinetinin 1992-ci il 27 iyul tarixli 412 nömrəli qərarı ilə təsdiq edilmiş (Azərbaycan Respublikası Nazirlər Kabinetinin 1998-ci il 19 fevral tarixli 35 nömrəli qərarına əlavə olunmuş) əlavənin “Azərbaycan Respublikası Daxili İşlər Nazirliyinin Dövlət Yol Polisi İdarəsi tərəfindən hüquqi və fiziki şəxslərə göstərilən xidmətlərin siyahısı”nın 3-cü bəndində “Nəqliyyat vasitələrinin qeydiyyata alınması, yenidən qeydiyyatdan keçirilməsi, qeydiyyatdan çıxarılması” sözləri çıxarılmışdır.
Nazirlər Kabinetinin 1993-cü il 1 oktyabr tarixli 527 nömrəli qərarı ilə təsdiq edilmiş 2 nömrəli əlavənin “Azərbaycan Respublikası Kiçik Həcmli Gəmilər üzrə Dövlət Müfəttişliyinin nəzarətində olan gəmilərin, onların dayanması üçün bazaların (qurğuların) qeydiyyatı, uçotu, texniki nəzarəti və gəmisürənlərin bu gəmiləri idarə etmək hüququ üçün attestasiya qaydaları”nın 8-ci bəndinin 3-cü yarımbəndində “habelə gəmi sahiblərindən yaşayış yeri (qeydiyyatı) üzrə”, 29-cu bəndinin üçüncü abzasında “və müəyyən edilmiş dövlət rüsumunun” sözləri və dördüncü abzası çıxarılmışdır.
“Azərbaycan Respublikasında beynəlxalq humanitar təşkilatlar və onların nümayəndəlikləri haqqında” Nazirlər Kabinetinin 1994-cü il 2 noyabr tarixli 376 nömrəli qərarının 2-ci bəndində “dövlət qeydiyyatına alındığı zaman” sözləri çıxarılmışdır.
Azərbaycan Respublikası Nazirlər Kabinetinin 1997-ci il 10 yanvar tarixli 6 nömrəli qərarı ilə təsdiq edilmiş “Azərbaycan Respublikası ərazisində beynəlxalq avtomobil daşımalarını tənzimləyən “İcazə sistemi” haqqında əsasnamə”nin 5-ci bəndinin ikinci abzasında “haqqını” sözü “dövlət rüsumunu” sözləri ilə əvəz edilmişdir.
Nazirlər Kabinetinin 2000-ci il 15 fevral tarixli 21 nömrəli qərarı ilə təsdiq edilmiş “Patent müvəkkilləri haqqında əsasnamə”nin 6.1-ci bəndinin birinci abzasında “ödənişi” sözü “dövlət rüsumu ödənilməsi” sözləri ilə, 6.4-cü bəndinin birinci abzasında “ödənişdən” sözü “dövlət rüsumu ödənildikdən” sözləri ilə əvəz edilmişdir.
Nazirlər Kabinetinin 2000-ci il 11 sentyabr tarixli 166 nömrəli qərarı ilə təsdiq edilmiş “Coğrafi göstəricini qeydə almaq üçün iddia sənədinin verilməsi və ekspertizası qaydaları”nın IV fəslinin 7-ci bəndinin ikinci abzası aşağıdakı yeni redaksiyada verilmişdir:
“Qeydə alınması haqqında qərar qəbul edildikdə iddiaçı dövlət rüsumu ödədikdən sonra əmtəə nişanları və ya coğrafi göstəricilər qeydə alınır, onlara dair məlumat dərc edilir və şəhadətnamə verilir”.
Nazirlər Kabinetinin 2000-ci il 11 sentyabr tarixli 167 nömrəli qərarı ilə təsdiq edilmiş “Azərbaycan Respublikasında notariat hərəkətlərinin aparılması qaydaları haqqında təlimat”ın 10-cu bəndinin birinci və ikinci abzaslarında “haqq” sözləri və 15-ci bəndinin ikinci abzasında “əlavə xidmət haqqı” sözləri “dövlət rüsumu” sözləri ilə əvəz edilmiş, 11-ci bənd aşağıdakı yeni redaksiyada verilmişdir:
“Dövlət rüsumunun məbləğləri barədə məlumat lövhə şəklində hər bir dövlət notariat kontorunun və ya xüsusi notariusun işlədiyi binanın (otağın) görkəmli yerində asılmalıdır”.
Nazirlər Kabinetinin 2001-ci il 1 mart tarixli 52 nömrəli qərarı ilə təsdiq edilmiş “Vətəndaşlıq vəziyyəti aktlarının qeydində dəyişiklik, bərpa və ləğv qaydalarını müəyyən edən əsas müddəalar”ın 3-cü bəndinin altıncı abzasından “habelə soyad şəkilçisini” sözləri çıxarılmışdır.
“Azərbaycan Respublikası Nazirlər Kabinetinin qüvvədən düşmüş hesab edilən bəzi qərarlarının və sərəncamının siyahısı” təsdiq edilmişdir.
Bu qərar imzalandığı gündən qüvvəyə minmişdir.
X X X
“Dövlət sosial sığorta sistemində fərdi uçot haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2001-ci il 26 dekabr tarixli Fərmanının 1-ci bəndinin altıncı abzasının icrasını təmin etmək məqsədi ilə Nazirlər Kabineti qərara almışdır ki, dövlət sosial sığorta şəhadətnaməsinin forması təsdiq edilsin.
Azərbaycan Respublikasının İqtisadi İnkişaf Nazirliyi, Maliyyə Nazirliyi, Əmək və Əhalinin Sosial Müdafiəsi Nazirliyi Azərbaycan Respublikasının Dövlət Sosial Müdafiə Fondu ilə birlikdə dövlət sosial sığorta şəhadətnaməsinin spesifikasiyası və onun hazırlanması ilə bağlı təkliflərini Nazirlər Kabinetinə təqdim etməlidirlər.
X X X
Azərbaycan Respublikasının Nazirlər Kabineti qərara almışdır ki, Bakı Bədən Tərbiyəsi Texnikumunun Bakı Bədən Tərbiyəsi və Turizm Kolleci adlandırılması haqqında Azərbaycan Respublikası Gənclər, İdman və Turizm Nazirliyinin təklifi qəbul edilsin.
X X X
Azərbaycan Respublikasının Nazirlər Kabineti qərara almışdır ki, Azərbaycan Milli Kulinariya Mərkəzinin Azərbaycan Respublikası Gənclər, İdman və Turizm Nazirliyinin strukturuna daxil edilməsi ilə bağlı həmin nazirliyin İqtisadi İnkişaf Nazirliyi və Maliyyə Nazirliyi ilə razılaşdırılmış təklifi qəbul edilsin.
X X X
“Tibbi sığorta haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 1999-cu il 30 dekabr tarixli Fərmanının icrasını təmin etmək məqsədi ilə Nazirlər Kabineti qərara almışdır ki, “Tibbi sığorta şəhadətnaməsinin forması və onun tətbiqi qaydaları” təsdiq edilsin.
Hər dörd qərar imzalandığı gündən qüvvəyə minmişdir.
Bu qərarlar barədə AZƏRTAC-a Nazirlər Kabinetinin mətbuat mərkəzindən məlumat vermişlər.
Bölmənin digər xəbərləri
