İDMAN
AZƏRBAYCAN ŞAHMATÇILARININ BÖYÜK UĞURU
İyulun 24-də Milli Olimpiya Komitəsinin İdman Kompleksində gənclər arasında şahmat üzrə Avropa çempionatının təntənəli bağlanış mərasimi keçirilmişdir. Yarışlar Milli Olimpiya Komitəsi, Gənclər, İdman və Turizm Nazirliyi, Azərbaycan Şahmat Federasiyası tərəfindən təşkil olunmuşdu.
Çempionatda 16 ölkənin 60-dan çox gənc şahmatçısı mübarizə aparmışdır. Yarışlarda komandamız daha geniş tərkibdə çıxış etmişdir.
Qızların yarışında qızıl medalı Azərbaycan şahmatçısı Zeynəb Məmmədyarova qazanmışdır. Gümüş və bürünc mükafatlara Gürcüstan idmançıları layiq görülmüşlər.
Oğlanlar arasında birinci yeri gürcü şahmatçısı Zviad İzoriya tutmuşdur. Gümüş və bürünc medalları isə həmyerlilərimiz Vüqar Həşimov və Şəhriyar Məmmədyarov qazanmışlar.
Azərbaycan Şahmat Federasiyasının Prezidenti, Milli Məclisin deputatı Aynur Sofiyeva çempionatın bağlanış mərasimindəki çıxışında qalibləri və iştiraşçıları təbrik edərək vurğuladı ki, gənclər arasında Avropa çempionatının paytaxtımızda uğurla keçirilməsi şahmatın Azərbaycanda geniş yayıldığını dünya idman ictimaiyyətinə bir daha nümayiş etdirdi. Aynur Sofiyeva belə mühüm yarışların təşkilinə köməyə görə dövlətimizin başçısı Heydər Əliyevə, Milli Olimpiya Komitəsinin prezidenti İlham Əliyevə dərin təşəkkürünü bildirdi.
Sonra qaliblərə və mükafatçılara medallar və qiymətli hədiyyələr təqdim edildi.
Foto İlqar Cəfərovundur