İDMAN
AZƏRBAYCAN ŞAHMATÇISI TEYMUR RƏCƏBOV MÖTƏBƏR BEYNƏLXALQ TURNİRDƏ DÖRDÜNCÜ YERİ TUTMUŞDUR
Almaniyanın Dortmund şəhərində şahmat üzrə 19-cu dərəcəli ənənəvi superturnir başa çatmışdır. Yarışlarda Viorel Boloqan, Arkadi Naydiç və həmvətənimiz, ən gənc beynəlxalq qrossmeysterlərdən biri Teymur Rəcəbov dünya şahmatının üç məşhur lideri – Vladimir Kramnik, Vişi Anand və Peter Lekoya qarşı mübarizə aparmışlar.
Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, yarışların 10-cu, yekun turunda cədvəldə heç bir dəyişiklik olmamışdır – görüşlərin üçü də heç-heçə başa çatmışdır. Kramnik sonuncu görüşdə Boloqana qalib gəlsəydi, birinci yeri tutacaqdı, lakin o, buna nail ola bilməmişdir. Beləliklə, Moldova qrossmeysteri Viorel Boloqan 10 mümkün xaldan 6,5 xal toplayaraq, turnirin qalibi olmuşdur. İkinci –üçünçü yerləri 5,5 xalla Vişi Anand və Vladimir Kramnik bölüşdürmüşlər. Onlardan yarım xal az toplamış Teymur Rəcəbov dördüncü yerə çıxmışdır. Peter Leko 4 xalla beşinci, Arkadi Naydiç isə 3,5 xalla axırıncı olmuşdur.