AZƏRBAYCAN TAEKVONDO FEDERASİYASININ PREZİDENTİ DÜNYA ÇEMPİONATININ MÜKAFATÇILARI İLƏ GÖRÜŞMÜŞDÜR
Xatırladaq ki, sentyabrın 24-28-də Almaniyanın Qarmiş-Partenkirxen şəhərində keçirilmiş dünya çempionatında bu idmançılar bürünc medallar qazanmış, 8 kişi və 2 qadın taekvondoçudan ibarət Azərbaycan yığma komandası isə ümumi hesabda 5-ci yer tutmuşdur.
Federasiyadan AZƏRTAC-ın müxbirinə bildirmişlər ki, Kəmaləddin Heydərov taekvondoçularımızın nailiyyətini yüksək qiymətləndirərək, demişdir ki, yaxın vaxtlarda Bakıda dünyada tayı-bərabəri olmayan müasir taekvondo idman kompleksi açılacaqdır. Bu, Azərbaycanın Baş naziri, Milli Olimpiya Komitəsinin prezidenti İlham Əliyevin ölkəmizdə idman hərəkatının inkişafına göstərdiyi qayğının daha bir əyani təsdiqi olacaqdır. Federasiyanın prezidenti vurğulamışdır ki, bütün bunlar Prezident Heydər Əliyevin siyasəti nəticəsində respublikamızda sabitliyin bərqərar edilməsi sayəsində mümkün olmuşdur.
Görüşdə iştirak edən Federasiyanın birinci vitse-prezidenti Füzuli Musayev bildirmişdir ki, taekvondoçularımız dekabrda Parisdə və gələn ilin fevralında Bakıda keçiriləcək lisenziya turnirlərində qələbə qazanmaq üçün qüvvə və səylərini əsirgəməyəcəklər.
Bölmənin digər xəbərləri
