Azərbaycan təmsilçisi Moskvada “Belaya trost” festivalının qala-konsertində çıxış edib
Moskva, 16 oktyabr, AZƏRTAC
Rusiya paytaxtındakı “Ostrov meçtı” əyləncə mərkəzinin “Moskva” konsert zalında “Belaya trost” (“Ağ əsa”) 16-cı Beynəlxalq Xeyriyyə Festivalının qala-konserti keçirilib. Bu, hər il oktyabrın 15-də qeyd olunan görmə əngəlli insanların rəmzi olan Beynəlxalq Ağ Əsa Gününə təsadüf edib.
AZƏRTAC xəbər verir ki, 11 ölkədən 50 finalçı arasında Azərbaycandan olan 5 nömrəli Respublika İxtisaslaşdırılmış İnternat Məktəbinin şagirdi Mədinə Ələsgərova da yer alıb.
Diana Qurtskayanın görmə əngəlli və zəif görmə qabiliyyəti olan uşaqlar üçün Xeyriyyə Fondunun təşkilatçılığı ilə keçirilən “Ürəyin çağırışı ilə” inklüziv festivalının seçmə mərhələlərində bu il 800-dən çox uşaq iştirak edib.
Konsertdən əvvəl Mədinə festivalın ruhlandırıcı rəhbəri, Rusiyanın Xalq artisti Diana Qurtskaya ilə görüşüb və o, bakılı gənc iştirakçıya dəstəyini ifadə edib.
Azərbaycanlı qız qala-konsertdə öz müəllimləri - tanınmış müğənni və musiqiçi Rodion Qazmanov və müğənni Aleksandra Vorobyeva ilə birgə çıxış edib. Gecənin sonunda bütün iştirakçılar Diana Qurtskaya ilə birlikdə mahnı ifa ediblər. Festivalın gənc finalçıları üçün Moskvada zəngin ekskursiya və mədəni proqram da hazırlanıb.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
