Azərbaycan Turizm və Menecment Universiteti elmi şurasının ilk iclası keçirilib
Bakı, 6 fevral, Türkan Abdullayeva, AZƏRTAC
Fevralın 6-da Azərbaycan Turizm İnstitutunun son, Azərbaycan Turizm və Menecment Universitetinin (ATMU) isə ilk elmi şurasının geniş tərkibli iclası keçirilib.
AZƏRTAC xəbər verir ki, Bakı Turizm Peşə Məktəbində (BTPM) təşkil olunan iclasda ATMU-nun elmi şurasının üzvləri, Mədəniyyət və Turizm Nazirliyinin nümayəndələri, universitetin və BTPM-in professor-müəllim heyəti, təhsil ocağının tələbə təşkilatlarının nümayəndələri iştirak ediblər.
İclasda universitetin rektoru, professor Cəfər Cəfərov Azərbaycan Turizm İnstitutunun (ATİ) 2006-2014-cü illərdə gördüyü işlər və yeni yaradılan ATMU-nun qarşısında duran vəzifələr haqqında məruzə ilə çıxış edib.
Qeyd edilib ki, Prezident İlham Əliyevin müvafiq Sərəncamı ilə Azərbaycan Turizm İnstitutunun bazasında yaradılan Azərbaycan Turizm və Menecment Universitetində kadr hazırlığına xüsusi diqqət yetirilir. Yeni universitetin yaradılması o deməkdir ki, turizm aparıcı sahə olmaqla yanaşı, bu ali təhsil ocağının üzərinə idarəetmənin başqa sahələrində də kadr hazırlığı ilə bağlı mühüm vəzifələr qoyulur.
Vurğulanıb ki, universitetdə təhsilin bütün mərhələləri üzrə turizm və menecment üzrə kadrlar hazırlanır.
Bildirilib ki, Azərbaycan Turizm İnstitutu (ATİ) 2006-cı il sentyabrın 15-də 200 tələbə, 1 fakültə və 3 ixtisasla tədris fəaliyyətinə başlamışdı. Hazırda 3 fakültə, 10 kafedrada 11 ixtisas üzrə bakalavriatura səviyyəsində 1527 nəfər, magistraturada 146 nəfər, doktoranturada 69 nəfər, ikinci ali təhsildə 27 nəfər və ilk peşə-ixtisas təhsili üzrə Bakı Turizm Peşə Məktəbində (BTPM) 12 ixtisas üzrə 460 şagird təhsil alır. Beləliklə, bu gün ATİ ailəsində bütövlükdə 2229 gənc turizm sahəsi üçün müxtəlif səviyyəli mütəxəssis kimi hazırlanmaqdadır.
Vurğulanıb ki, ATİ Bolonya sistemini həyata keçirən ilk təhsil müəssisələrindən biri olub. Tədrisin bu prinsiplər əsasında təşkili ATİ-nin Avropa təhsil müəssisələri ilə sərbəst əməkdaşlığına şərait yaradıb. ATİ Avstriyanın İMC Krems Tətbiqi Elmlər Universiteti ilə bakalavr və magistr hazırlığı sahəsində ikili diplom proqramını uğurla həyata keçirməklə yanaşı, Avropanın digər ali məktəbləri ilə də sıx əməkdaşlıq edib.
Diqqətə çatdırılıb ki, ATMU-nun sələfi olan ATİ bir sıra təşkilatların üzvüdür. ATİ-nin 30 xarici ali məktəb, 34 beynəlxalq təşkilat və şəbəkə ilə əlaqələri qurulub və müvafiq müqavilələr imzalanıb.
Bildirilib ki, ATİ tələbələrinin öz nəzəri biliklərini istehsalat təcrübəsində möhkəmləndirmək imkanı da mövcuddur. ATİ tələbələrinin əksəriyyəti Türkiyə, İsrail, Şimali Kipr, Almaniya, Yunanıstanda yay tanışlıq və peşə təcrübəsi keçiblər.
Bununla yanaşı, turizm sektorunda işləyənlərin əlavə təhsil proqramı və qısamüddətli kurslar vasitəsilə ixtisasartırmasına, yenidənhazırlanmasına (ixtisas dəyişməsinə) nail olmaq üçün müvafiq işlər görülüb.
Diqqətə çatdırılıb ki, Nazirlər Kabinetinin müvafiq qərarı ilə Azərbaycan Turizm İnstitutunun nəzdində Bakı Turizm Peşə Məktəbi yaradılıb.
Rektor qeyd edib ki, Azərbaycan Turizm və Menecment Universiteti ATİ-nin varisi olaraq, mövcud ixtisaslar qalmaqla və yeni ixtisasların açılması şərti ilə yaxın 5-10 ildə beynəlxalq tələblərə cavab verən, öz akademik şəhərciyi olan, beynəlxalq akkreditasiyadan keçən, 25-dən çox ixtisas üzrə təxminən 6-8 min tələbəsi olan, “tədris-təlim-təcrübə-tədqiqat” modelinə əsaslanan turizm və digər xidmət sahələrində aparıcı dövlət ali təhsil müəssisəsinə çevrilməyi planlaşdırır.
Regionların sosial-iqtisadi inkişafı, əhalinin iş təminatının yaxşılaşması, tələbələrin əldə etdikləri nəzəri biliklərin təcrübə ilə əlaqələndirilməsi və onların əlavə gəlirlərinin artırılması və iş təcrübəsi toplaması baxımından regional peşə məktəblərinin də açılması gündəmdədir.
İclasda çıxış edən mədəniyyət və turizm naziri Əbülfəs Qarayev bildirib ki, ötən ilin son ayı bizim işlədiyimiz sektor üçün çox əlamətdar hadisələrlə, yeniliklərlə zəngin dövr olub. Dekabr ayında Prezident İlham Əliyev Mədəniyyət və Turizm Nazirliyi sisteminin təkmilləşdirilməsi ilə bağlı bir neçə mühüm sənədlər imzalayıb. Bu mühüm qərarlardan biri də ATMU-nun yaradılmasıdır.
Nazir ATMU-nun fəaliyyəti, bu təhsil ocağında hazırlanan kadrların günün tələblərinə cavab verməsi istiqamətində atılan addımlar və universitetin perspektivlərindən söz açıb.
Bildirilib ki, ATMU-nun qarşısına qoyduğu fəaliyyət planı bu təhsil ocağının nə qədər geniş bir işi öhdəsinə götürdüyünü aydın şəkildə göstərir. Ə. Qarayev deyib ki, bu gün universitetin qarşısında maddi-texniki bazanın gücləndirilməsi, onun şəbəkəsinin formalaşdırılması, nizamnamə və ixtisasların əhatə dairəsinin genişləndirilməsi kimi mühüm vəzifələr durur.
Nazir vurğulayıb ki, bu gün turizmin inkişafını Azərbaycanın tarixi irsi olmadan düşünmək mümkün deyil. Bu irsi ölkəyə gələn qonaqlara təqdim etmək, onlara tanıtmaq bilavasitə turizm sənayesinin fəaliyyət istiqamətlərindəndir. Həmçinin teatrların, muzeylərin və digər mədəniyyət ocaqlarının fəaliyyəti də bilavasitə turizmlə bağlıdır.
Ə.Qarayev diqqətə çatdırıb ki, ilk növbədə tədris sistemi müəyyənləşdirilməli, qazanılmış təcrübəyə əsasən təmin olunmalıdır. Bunun üçün yeni universitetin kadr potensialı yaradılmalı, inkişaf konsepsiyası formalaşdırılmalıdır.
Qazanılmış təcrübədən tədris prosesində istifadə etməyin vacibliyini vurğulayan nazir bildirib ki, təhsilin səviyyəsinin artırılması üçün müəyyən qurumlarla müqavilələr bağlanmalı, tələbələrin təcrübə toplaması üçün şərait yaradılmalıdır.
Bu məqsədlə nazir Əbülfəs Qarayev elmi şuranın iclasında iştirak edən aidiyyəti qurumların rəhbərlərinə müvafiq tapşırıqlar verib.
Elmi şuranın geniş tərkibli iclasında bir sıra qərarlar qəbul olunub. Bildirilib ki, universitetin 2020-ci ilədək inkişaf strategiyası hazırlanıb nazirliyə təqdim edilməli, elmi şurada müzakirə olunan məsələlər və qəbul edilən qərarlar ictimaiyyətə çatdırılmalıdır.
Bölmənin digər xəbərləri
