Azərbaycan–Türkmənistan əməkdaşlığı Xəzər regionunda, bütövlükdə Avrasiyada inkişafa və rifaha xidmət edir - ŞƏRH
Bakı, 24 avqust, AZƏRTAC
Azərbaycan Prezidenti İlham Əliyevin Türkmənistana səfəri ölkələrimizin ikitərəfli münasibətlərinin və Azərbaycanın Mərkəzi Asiya ölkələri ilə əlaqələrinin dərinləşməsində mühüm rol oynayan əlamətdar hadisədir.
İlk növbədə, qeyd etməliyik ki, Mərkəzi Asiya, Qafqaz və bu kimi region anlayışları şərti xarakter daşıyır. Heç bir regional çərçivə bir dövlətin siyasi, tarixi və mədəni identikliyini tam şəkildə əhatə edə bilməz. Bu baxımdan Qafqazda yerləşən Azərbaycanın Mərkəzi Asiya ölkələri ilə tarixi-mədəni bağlarının dərinliyi, ortaq maraqlar və əməkdaşlıq potensialı xüsusi vurğulanmalıdır.
Bu sözləri AZƏRTAC-a açıqlamasında Milli Məclisin deputatı Qaya Məmmədov söyləyib.
Deputat bildirib ki, Mərkəzi Asiya ölkələrinin hər biri Azərbaycan üçün böyük dəyərə malikdir. Onların arasında Türkmənistan özünəməxsus yer tutur. Qardaş Türkmənistan ilə əməkdaşlığımız mühüm inkişaf potensialına malikdir. İki xalqı birləşdirən ortaq köklərin, tarixin və mədəniyyətin təbliği gələcək əməkdaşlığın əsas dayaqlarından biridir.
İki ölkə rəhbərləri arasında formalaşmış qarşılıqlı etimada əsaslanan münasibətlər və xalqlarımızın yaxınlığı praktiki əməkdaşlığın inkişafı üçün möhkəm zəmin yaradır. Bu kontekstdə energetika sahəsində əməkdaşlıq xüsusilə diqqət çəkir.
Türkmənistan zəngin karbohidrogen ehtiyatlarına görə dünyanın aparıcı ölkələrindən biridir. BP-nin qiymətləndirməsinə görə, hazırkı bazar qiymətləri ilə 5 trilyon ABŞ dolları dəyərində hesablanan 19,5 trilyon kubmetr təbii qaz ehtiyatı ilə Türkmənistan dünyada 4-cü yerdədir. Ötən dövrdə Türkmənistan öz qaz yataqlarının işlənməsi və dünya bazarına çıxarılması istiqamətində xeyli uğur əldə edib. Eyni zamanda, bu ölkənin malik olduğu nəhəng qaz ehtiyatları ona qlobal enerji bazarlarında daha geniş rol oynamaq imkanı yaradır.
"Azərbaycan özünün konstruktiv və çevik siyasəti ilə Avrasiya enerji resurslarının işlənməsində və ixracında mühüm rol oynayır. Burada istehlakçı dövlətlər arasında olduğu kimi, istehsalçı ölkələrin əməkdaşlığının inkişaf etdirilməsi məsələsi xüsusi əhəmiyyət daşıyır. Bu yanaşma istehsalçı dövlətlərin maraqlarının uzlaşdırılmasına, qarşılıqlı əlaqələndirilmiş ixrac infrastrukturunun qurulmasına və nəticə etibarilə ədalətli, sabit və balanslı energetika bazarının formalaşmasına xidmət edir. Bu baxımdan Azərbaycan–Türkmənistan enerji əməkdaşlığının inkişafı Xəzər regionu, həmçinin bütövlükdə Avrasiyada sabitlik, inkişaf və rifah üçün böyük əhəmiyyət daşıyır.
Səfər çərçivəsində diqqətçəkən məqamlardan biri də Azərbaycan, Türkmənistan və Özbəkistan rəhbərlərinin üçtərəfli görüşü oldu. Bu görüş bir neçə səbəbdən əlamətdardır: ilk növbədə, onun Türkmənistanda keçirilməsi bu ölkənin regional məsələlərdə və Türk dünyası çərçivəsində əməkdaşlıqda artan fəallığını göstərir. Eyni zamanda, bu format Azərbaycan ilə Mərkəzi Asiya ölkələri arasında sıx əməkdaşlıq potensialını və Azərbaycan ilə Mərkəzi Asiyanın vahid məkan kimi çıxış etmə imkanlarını nümayiş etdirir", - deyə Q. Məmmədov vurğulayıb.
Deputat əlavə edib ki, Azərbaycan rəhbərinin təşəbbüsləri və uzaqgörən siyasəti nəticəsində Türk dünyasında əməkdaşlıq dərinləşir, dünya okeanına birbaşa çıxışı olmayan Türk dövlətləri üçün alternativ nəqliyyat marşrutları inkişaf etdirilir, bununla da qlobal sülhə, əmin-amanlığa və əməkdaşlığa böyük töhfələr verilir.
Bölmənin digər xəbərləri
