AZƏRBAYCAN VƏ AVSTRİYA XARİCİ İŞLƏR NAZİRLİKLƏRİ ARASINDA İKİTƏRƏFLİ MƏSLƏHƏTLƏŞMƏLƏR KEÇİRİLMİŞDİR
Məsləhətləşmələrdə Azərbaycanın xarici işlər nazirinin müavini Xələf Xələfovun başçılığı ilə nümayəndə heyəti və ölkəmizin Avstriyadakı səfiri Fuad İsmayılov, səfirliyin əməkdaşları iştirak etmişlər. Nümayəndə heyəti Avstriya Xarici İşlər Nazirliyinin baş katibi Yohannes Kirle, XİN-nin əsas qurumlarının - Cənubi Qafqaz və Mərkəzi Asiya İdarəsinin rəisi Hanns Porias, Hüquq və Konsulluq məsələləri Departamentinin rəisi Kristian Berlakovits, İnteqrasiya və İqtisadi-Siyasi məsələlər Departamentinin rəisi Martin Saydik, Siyasi Departamentin rəisi Tomas Mayr-Hartinq ilə görüşlər keçirmişdir.
Avstriyanın Xarici İşlər Nazirliyində keçirilmiş görüşlərdə Azərbaycan və Avstriya arasında mövcud ikitərəfli münasibətlərin siyasi, iqtisadi və humanitar istiqamətləri, ölkələrimizin əlaqələrinin daha da inkişaf etdirilməsi yolları, Azərbaycanın Avropa İttifaqının qonşuluq siyasətində iştirakı, Avropa İttifaqına 2006-cı ilin birinci yarısında sədrliyi dövründə Avstriyanın bu işə verə biləcəyi töhfə, qloballaşma dövründə Azərbaycan xarici siyasətinin prioritetləri, o cümlədən Azərbaycanın Avratlantik strukturlara davamlı və sıx inteqrasiyası məsələləri müzakirə edilmiş, respublikamızda gedən ictimai, siyasi proseslər, həyata keçirilən islahatlar barədə ətraflı məlumat verilmişdir.
Xarici işlər nazirinin müavini X.Xələfov Ermənistan-Azərbaycan, Dağlıq Qarabağ münaqişəsinin nizamlanması prosesinə dair son vəziyyət barədə Avstriya tərəfini məlumatlandırmış və beynəlxalq təşkilatların, ilk növbədə BMT, ATƏT, Avropa İttifaqı və Avropa Şurasının münaqişənin nizamlanmasında səylərinin artırılmasının vacibliyini bildirmış, Azərbaycanın Cənubi Qafqaz ölkələri və qonşu dövlətlərlə münasibətlərindən, Xəzərin hüquqi statusu üzrə danışıqların gedişindən, bölgədə irimiqyaslı neft, qaz və nəqliyyat layihələrinin həyata keçirilməsindən danışmışdır.
Məsləhətləşmələr zamanı ölkələrimiz arasında konsulluq münasibətlərinə xüsusi diqqət yetirilmiş, respublikalarımızın vətəndaşlarının gediş-gəliş və viza məsələləri, Azərbaycan vətəndaşlarının üzləşdiyi problemlərin aradan qaldırılması yolları müzakirə edilmişdir.
Müzakirələrdə təhlükəsizlik, beynəlxalq terrorizmə, yeni təhlükə və təhdidlərə, o cümlədən narkotiklərin qanunsuz dövriyyəsinə, insan alverinə, mütəşəkkil cinayətkarlığa, qeyri-qanuni miqrasiyaya qarşı mübarizə və qarşılıqlı fəaliyyət məsələləri üzrə geniş fikir mübadiləsi aparılmış, Azərbaycan və Avstriya xarici siyasət idarələri arasında məsləhətləşmələrin əhəmiyyəti vurğulanmış, bu işin gələcəkdə də davam etdirilməsi haqqında razılıq əldə olunmuşdur.
Səfər proqramına uyğun olaraq, X.Xələfov və nümayəndə heyəti Avstriya Federal Prezidenti Kabinetinin rəhbəri Rene Pollitser və Federal Kansler Kabinetinin xarici əlaqələr üzrə müşaviri Hans Peter Mants ilə görüşmüşdür. Bu görüşdə aparılmış fikir mübadiləsi zamanı Azərbaycan-Avstriya münasibətlərinin getdikcə inkişaf etdiyi, son vaxtlar müxtəlif sahələr üzrə yüksək səviyyəli dövlət məmurlarının qarşılıqlı rəsmi səfərlərinin artmasının buna bariz nümunə olduğu bildirilmiş, əlaqələrin daha yüksək səviyyəyə qaldırılması məqsədi ilə ölkələrimizin Prezidentləri səviyyəsində səfərlərin həyata keçirilməsinin zəruriliyi vurğulanmışdır. Bu baxımdan, 2006-cı ildə Avstriya Prezidentinin Azərbaycana rəsmi səfəri məsələsi müzakirə olunmuş, həmin səfərin tarixlərinin diplomatik kanallar vasitəsilə dəqiqləşdiriləcəyi qeyd edilmişdir. Görüşlərdə, həmçinin Ermənistan-Azərbaycan, Dağlıq Qarabağ münaqişəsinin nizamlanması prosesi haqqında Azərbaycanın mövqeyinə dair ətraflı məlumat verilmişdir.
Azərbaycan nümayəndə heyəti Avstriya Parlamentinin Xarici Əlaqələr Komitəsinin sədri Peter Şider ilə də görüşmüşdür. Görüşdə Azərbaycan tərəfi ölkələrimiz arasında mövcud əməkdaşlığa toxunaraq, bu əlaqələrin respublikalarımızın parlamentlərinin həm ikitərəfli, həm çoxtərəfli formatlarda inkişaf etdirilməsinin vacibliyini vurğulamışdır. Həmçinin, görüşdə Ermənistan-Azərbaycan, Dağlıq Qarabağ münaqişəsi, regional vəziyyət barədə fikir mübadiləsi aparılmışdır.
Səfərin sonunda X.Xələfov Avstriyanın nüfuzlu “Austria Presseagentur” xəbər agentliyinin, “Kurier” və “Der Standard” qəzetlərinin müxbirlərinə müsahibə vermişdir.
Bölmənin digər xəbərləri
