Sentyabrın 7-də respublika Voleybol Federasiyasının idman salonunda Azərbaycanın və Türkiyənin voleybol üzrə yığma qadın komandaları arasında yoldaşlıq görüşünün ikinci oyunu keçirilmişdir.

Qardaş ölkənin yığma komandasının rəhbərliyi Bakıdakı görüşə yaxın vaxtlarda Türkiyədə keçiriləcək Avropa çempionatına, Azərbaycan kollektivinin məşqçisi Faiq Qarayev isə gələn ilin yanvarında ölkəmizin paytaxtında olacaq olimpiya lisenziya turnirinə hazırlıq mərhələsi kimi baxırlar.

Görüşün ilk dəqiqələrindən meydançada gərgin mübarizə getmişdir. Birinci hissənin sonuna yaxın qonaqlar irəli çıxaraq, 25:21 hesabı ilə qalib gəlmişlər. İkinci hissə 25:20 hesabı ilə idmançılarımızın xeyrinə qurtarmışdır. Lakin üçüncü və dördüncü hissələrdə Türkiyə idmançıları daha yaxşı oynayaraq, eyni hesabla (25:21) qalib gəlmişlər. Beləliklə, bu oyunda ümumi hesab qonaqların xeyrinə olmuşdur: 3:1.

Xatırladaq ki, birinci oyun həmin hesabla komandamızın xeyrinə nəticələnmişdir.