Astara, 26 may, Bağır Əliyev, AZƏRTAC

Mayın 26-da ölkəmizin cənub bölgəsində Azərbaycan Xalq Cümhuriyyətinin 100 illik yubileyi silsilə tədbirlərlə qeyd olunub.

AZƏRTAC-ın bölgə müxbiri xəbər verir ki, Astarada keçirilən ümumrayon tədbirinin iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.

Tədbirdə çıxış edən rayon icra hakimiyyətinin başçısı Qəzənfər Ağayev 1918-ci il mayın 28-də müsəlman Şərqində ilk demokratik respublikanın - Azərbaycan Xalq Cümhuriyyətinin yaranmasının xalqımızın həyatında ən unudulmaz günlərdən biri olduğunu vurğulayıb, yaşadığı 23 ay ərzində cümhuriyyətin gördüyü işləri, qəbul edilən dövlət rəmzlərini tariximizin ən yaddaqalan səhifələri kimi dəyərləndirib.

Bildirilib ki, 1920-ci il aprelin 28-də bolşevik qoşunları tərəfindən Azərbaycan Xalq Cümhuriyyəti süquta uğradılıb. Lakin, xalqımızın qəlbində azadlıq arzusu, məşəli heç vaxt sönməyib. 1990-cı ilin əvvəllərində xalqımızın yenidən müstəqil olmaq uğrundakı mübarizəsi öz bəhrəsini verib, Azərbaycan 1991-ci il oktyabrın 18-də öz müstəqilliyini bərpa edib.

Diqqətə çatdırılıb ki, yenidən qazanılmış müstəqilliyin ilk illərində ölkəmiz ağır günlər yaşayıb, hətta müstəqilliyini itirmək təhlükəsi ilə üzləşib. Belə bir çətin günlərdə xalqımızın təkidli tələbi və xahişi ilə yenidən respublika rəhbərliyinə qayıdan görkəmli siyasi və dövlət xadimi Heydər Əliyevin apardığı müdrik və qətiyyətli siyasət nəticəsində müstəqilliyimizin əbədiliyi və sarsılmazlığı təmin olunub, Azərbaycan özünün hərtərəfli inkişafının yeni mərhələsinə qədəm qoyub.

Tədbirdə çıxış edən Astara Rayon Məhkəməsinin sədri Zamin İbrahimov, Siyaku kənd tam orta məktəbinin direktoru, “Tərəqqi” medallı Teymur Fətullayev, Astara Pedaqoji Kollecin tarix müəllimi Elçin Mahmudov, Astara şəhər 1 nömrəli tam orta məktəbin IX sinif şagirdi Fidan Dadaşzadə və başqaları Azərbaycan Xalq Cümhuriyyətinin yaranma tarixi, fəaliyyəti, dövlətçilik sahəsində gördüyü işlərdən danışıblar.

Ümumrayon tədbiri dənizkənarı park-bulvar kompleksində konsert proqramı ilə davam edib.

X   X   X

Mayın 26-da Lənkəran şəhərində Azərbaycan Xalq Cümhuriyyətinin 100 illik yubileyinə həsr olunmuş yürüş-marafonda minlərlə gənc və yeniyetmə iştirak edib.

Yürüş-marafon Dövlət Bayrağı Meydanından start götürərək Heydər Əliyev Xatirə Parkında Ümummilli Liderin abidəsi qarşısında başa çatıb.

Həmin gün Lənkəran şəhərindəki Heydər Əliyev Mərkəzində Azərbaycan Xalq Cümhuriyyətinin 100 illiyinə həsr olunmuş konfransın iştirakçıları əvvəlcə Ümummilli Liderin abidəsi önünə gül dəstələri düzərək xatirəsini ehtiramla yad edib, Mərkəzin foyesində Respublika Günü ilə bağlı təşkil edilmiş rəsm sərgisinə baxıblar.

Konfransda çıxış edən Lənkəran Şəhər İcra Hakimiyyətinin başçısı Taleh Qaraşov 1918-ci ilin mayın 28-ni xalqımızın milli azadlıq mübarizəsi tarixinə qızıl hərflərlə yazılmış gün kimi dəyərləndirərək, Azərbaycan xalqının məhz həmin tarixi gündə əsrlər boyu həsrətində olduğu milli azadlığına qovuşduğunu, müstəmləkə əsarətindən qurtulduğunu və dövlət müstəqilliyini qazandığını diqqətə çatdırıb. Qeyd olunub ki, Şərqdə ilk dünyəvi dövlət olmuş Azərbaycan Xalq Cümhuriyyəti cəmi 23 ay yaşamasına baxmayaraq, qısa müddətdə böyük işlər görülüb, tarixi zəngin dövlətçilik ənənələri formalaşdırılıb.

T.Qaraşov sürətlə inkişaf edib dünyanın qabaqcıl dövlətləri sırasına yüksəlmiş bugünkü müstəqil Azərbaycan Respublikasının Xalq Cümhuriyyətinin varisi olduğunu diqqətə çatdıraraq, 100 il bundan əvvəl əsası qoyulmuş dövlətimizin bu gün qazandığı nailiyyətlərlə hər bir azərbaycanlının fəxr etdiyini, bu əziz bayramı qürur hissi ilə qarşıladığını bildirib.

Konfransda Azərbaycan Xalq Cümhuriyyətinin 100 illiyi ilə bağlı məruzələr və çıxışlar dinlənilib.

Çıxış edənlər Xalq Cümhuriyyətinin fəaliyyətini yüksək dəyərləndirərək lənkəranlıların dövlətimizin başçısının apardığı müdrik siyasəti bəyəndiyini və onun ətrafında sıx birləşdiyini bildiriblər.

X   X   X

28 May - Respublika Günü münasibətilə Lerikdə keçirilən ümumrayon tədbirində Şərqdə ilk demokratik respublikanın - Azərbaycan Xalq Cümhuriyyətinin tarixi xidmətlərindən danışılıb.

Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, Azərbaycan Xalq Cümhuriyyətinin 100 illik yubileyinə həsr olunmuş sərgi ilə tanış olublar.

Mədəniyyət Mərkəzinin qarşısındakı meydanda rayon icra hakimiyyətinin başçısı Rövşən Bağırov rayonun uzunömürlü sakini, anadan olmasının 100 illiyini qeyd edən ağsaqqal Məmmədxan Abbasovla görüşərək, ona rayon icra hakimiyyətinin fəxri fərmanını təqdim edib.

Lerik Rayon Mədəniyyət Mərkəzində Azərbaycan Respublikasının dövlət himnin səsləndirilməsi ilə başlanan konfransın iştirakçıları Xalq Cümhuriyyətinin 100 illik yubileyinə həsr olunmuş “Əbədi ezamiyyət” sənədli filminə baxıblar.

Konfransda çıxış edən Lerik Rayon İcra Hakimiyyətinin başçısı Rövşən Bağırov bildirib ki, 1918-ci il mayın 28-də Azərbaycan Xalq Cümhuriyyətinin elan edilməsi ilə xalqımızın qədim dövlətçilik ənənələri bərpa olunub, insan hüquqlarının və azadlıqlarının təminatına, irqi, milli, dini, sosial bərabərsizliklərin ləğvinə, demokratik dövlət quruculuğunun həyata keçirilməsinə əsaslı şərait yaradılıb.

Qeyd olunub ki, müasir müstəqil Azərbaycanda gedən demokratik, hüquqi, dünyəvi dövlət quruculuğu prosesi ölkəmizin dövlət müstəqilliyinin daha da möhkəmlənməsinə, əbədi və sarsılmaz dövlətçiliyimizin daha da qüdrətlənməsinə xidmət edir. Dövlətimiz bütün ölkələrlə qarşılıqlı surətdə faydalı, ikitərəfli münasibətlərin inkişafında maraqlıdır. Müstəqil daxili və xarici siyasət yeridən, nüfuzlu beynəlxalq təşkilatların üzvü olan Azərbaycan Respublikası artıq təkcə regionda deyil, dünya miqyasında söz sahibi olan dövlət kimi tanınır.

Konfransda Azərbaycan Xalq Cümhuriyyətinin 100 illik yubileyi ilə bağlı məruzələr dinlənilib.

Sonra Xalq Cümhuriyyətinin 100 illiyi münasibətilə rayonun ictimai-siyasi həyatında fərqlənənlərin bir qrupuna rayon icra hakimiyyətinin fəxri fərmanları təqdim olunub.

Ümumrayon tədbiri bayram konserti və atəşfəşanlıqla başa çatıb.

X   X   X

Yardımlı rayon mədəniyyət və istirahət parkında Azərbaycan Xalq Cümhuriyyətinin 100 illiyinə həsr olunmuş ümumrayon tədbirinin iştirakçıları əvvəlcə ulu öndər Heydər Əliyevin abidəsi önünə gül dəstələri düzərək, dahi rəhbərin xatirəsini ehtiramla yad ediblər.

Cümhuriyyətin 100 illiyinə həsr olunmuş tədbirdə çıxış edən rayon icra hakimiyyətinin başçısı Ayaz Əsgərov rayon sakinlərini əziz bayram - Respublika Günü münasibətilə təbrik edib. Qeyd olunub ki, 1918-ci il mayın 28-də müsəlman Şərqində ilk demokratik respublika - Azərbaycan Xalq Cümhuriyyəti yaranıb və bu tarix xalqımızın həyatında ən unudulmaz günlərdən biridir.

Bildirilib ki, Xalq Cümhuriyyəti bolşevik işğalı nəticəsində süquta uğrasa da, Azərbaycan 1991-ci il oktyabrın 18-də öz müstəqilliyini yenidən bərpa etdi. Hazırda müstəqil Azərbaycan Respublikası dünyanın inkişaf etmiş ölkələri sırasına daxil olub, mötəbər beynəlxalq təşkilatların tamhüquqlu üzvüdür. Azərbaycan xalqı, o cümlədən, cəlilabadlılar Prezident İlham Əliyevin apardığı müdrik siyasəti ürəkdən bəyənir və onun ətrafında sıx birləşiblər.

Tədbir bayram konsert proqramı ilə davam edib.